Takimi 3-orësh me Putin, të dërguarit e Trump nisen drejt Kievit! Çfarë po përgatitet për Ukrainën
Sunday 6 September 2026, 10:10
Dritare.net
Dy të dërguarit e Shteteve të Bashkuara, Steve Witkoff dhe Jared Kushner, pritet të mbërrijnë sot në Kiev për bisedime mbi përfundimin e luftës në Ukrainë, vetëm një ditë pas takimit të tyre me presidentin rus Vladimir Putin në Moskë.
Sipas Shtëpisë së Bardhë, Witkoff dhe Kushner zhvilluan të shtunën një takim rreth treorësh me Putin në Kremlin, ku u diskutuan “plane konkrete për hapat e ardhshëm” në përpjekjet për t’i dhënë fund luftës.
Zyrtarët amerikanë kanë shprehur shpresën se edhe takimet në Ukrainë do të jenë “po aq produktive” sa bisedimet e zhvilluara në Moskë. Ende nuk janë bërë publike detajet e propozimeve të diskutuara me presidentin rus, por një njoftim mbi hapat e ardhshëm pritet gjatë javëve në vijim.
Vizita në Kiev do të jetë e para për dy negociatorët kryesorë të presidentit amerikan Donald Trump që prej nisjes së përpjekjeve të reja diplomatike për arritjen e një marrëveshjeje mes Rusisë dhe Ukrainës.
Ndërkohë, Putin dhe presidenti ukrainas Volodymyr Zelensky kanë rënë dakord për ndalimin për tre ditë të sulmeve ndaj kryeqyteteve të njëri-tjetrit.
Teksa Witkoff dhe Kushner zhvillonin negociatat në Kremlin, Zelensky deklaroi se ishte i gatshëm për “një bisedë thelbësore”.
Takimi në Moskë u zhvillua me dyer të mbyllura në rezidencën zyrtare të Putinit në zemër të kryeqytetit rus. Edhe pse detajet mbeten të pakta, deklaratat e bëra pas bisedimeve nga të dyja palët kanë qenë përgjithësisht pozitive.
Këshilltari i Putinit, Yuri Ushakov, i cilësoi negociatat si “konstruktive dhe jashtëzakonisht të sinqerta”.
Sipas tij, diskutimet nuk u kufizuan vetëm te mundësitë për zgjidhjen e luftës në Ukrainë. Në takim u trajtuan gjithashtu çështje ekonomike dhe projekte të mundshme të mëdha mes Rusisë dhe Shteteve të Bashkuara, të cilat Moska i konsideron me interes të ndërsjellë.
Ushakov tha gjithashtu se gjatë takimit u diskutuan zhvillimet në front dhe avancimet e forcave ruse, ndërsa Moska këmbënguli se çdo negociatë duhet të trajtojë ato që Kremlini i quan “shkaqet rrënjësore të konfliktit”.
Bisedimet diplomatike zhvillohen në një kohë kur Rusia dhe Ukraina kanë intensifikuar sulmet ajrore gjatë muajve të fundit. Rusia ka vazhduar sulmet me raketa dhe dronë ndaj qyteteve ukrainase, përfshirë Kievin, ndërsa Ukraina është përqendruar në goditjen e infrastrukturës ekonomike ruse, veçanërisht instalimeve të naftës.
Rusia vazhdon të kontrollojë rreth një të pestën e territorit të Ukrainës, ndërsa përpjekjet diplomatike për një marrëveshje që do t’i jepte fund luftës duket se po hyjnë në një fazë të re.
Pas Moskës, ndalesa e radhës për Witkoff dhe Kushner është Kievi, ku pritet të bëhet më e qartë nëse propozimet e diskutuara me Putin mund të shërbejnë si bazë për avancimin e negociatave mes Rusisë dhe Ukrainës./dritare.net
