Rama për Zelenskyn: Është gabim për Kosovën, por Ukraina duhet të jetë e lirë
Thursday 13 August 2026, 13:01
Dritare.net
Kryeministri Edi Rama ka reaguar pas deklaratës së presidentit ukrainas Volodymyr Zelensky në Beograd se Ukraina nuk do ta njohë Kosovën, duke u bërë thirrje shqiptarëve të mos e kushtëzojnë mbështetjen për Ukrainën me qëndrimin e saj ndaj Kosovës.
Në një reagim të publikuar në rrjetet sociale, Rama e cilëson Zelenskyn si “mikun tim të dashur”, por thekson se qëndrimi i Ukrainës për Kosovën është i gabuar.
“Ukraina mund të jetë, dhe po, është gabim për Kosovën, por e drejta e saj për të qenë e lirë mbetet e padiskutueshme”, shkruan Rama.
Kryeministri kritikon edhe reagimet e disa shqiptarëve në Tiranë dhe Prishtinë, të cilët, pas deklaratës së Zelenskyt, kanë propozuar që Shqipëria dhe Kosova të ndryshojnë qëndrimin ndaj Ukrainës.
Sipas Ramës, mbështetja ndaj një vendi që përballet me agresion nuk duhet të shihet si një marrëdhënie “shpërblim për shpërblim”.
“Liria nuk funksionon me kthim shpërblimi”, shprehet Rama, duke shtuar se qëndrimi kundër një lufte agresioni dhe në favor të një paqeje të drejtë nuk është një favor që shkëmbehet me një favor tjetër.
Rama thekson se Shqipëria mund të mbajë njëkohësisht dy qëndrime: të kundërshtojë mosnjohjen e Kosovës nga Ukraina dhe, në të njëjtën kohë, të vazhdojë mbështetjen për popullin ukrainas në luftën kundër agresionit rus.
Sipas tij, këto dy të vërteta “mund të jetojnë në mënyrë të përkryer në të njëjtën fjali”.
Reagimi i Ramës vjen pas vizitës së Zelenskyt në Beograd, ku presidenti ukrainas përsëriti qëndrimin e Kievit se nuk e njeh pavarësinë e Kosovës.
Statusi i plote:
Miku im i dashur, Volodymyr Zelensky, qëndroi në Beograd dhe tha se Ukraina nuk do ta njohë kurrë Kosovën. Brenda një ore, nacionalistët më të zhurmshëm folklorikë në Tiranë dhe Prishtinë nisën të bënin llogaritjet gjeopolitike: ndoshta duhet ta ndëshkojmë Ukrainën, të ndalojmë së mbështeturi të lirët dhe së vajtuari për të bombarduarit. Më të pamaturit na sulmuan pse nuk hoqëm dorë nga Ukraina. Disa madje brohoritën për Rusinë!
Sa turp të humbasësh nga sytë të vërtetën e thjeshtë se liria nuk funksionon me kthim shpërblimi.
Të qëndrosh kundër një lufte agresioni dhe për një paqe të drejtë nuk është një faturë që e gris kur viktima e një agresioni barbar të zhgënjen. Nuk është një favor që shkëmbehet me një favor tjetër, por është ajo që je dhe ajo për të cilën qëndron në këtë botë të rrëmujshme. Dhe për fat të mirë, Shqipëria nuk është një njeri i vogël që llogarit se kush i detyrohet kujt, por është Europa e Ballkanit që tregon rrugën përmes besimit të saj te liria, demokracia dhe paqja, si dhe përmes forcës së shembullit të saj.
Ukraina mund të jetë, dhe po, është gabim për Kosovën, por e drejta e saj për të qenë e lirë mbetet e padiskutueshme. Dhe të luftosh për këtë të drejtë do të thotë të luftosh për Europën dhe për veten tonë gjithashtu. Këto të vërteta mund të qëndrojnë fare mirë në të njëjtën fjali. Shqipëria është mjaftueshëm e rritur për t’i mbajtur të dyja dhe do t’i mbajë.
Pra, po: URIME UKRAINËS SË LIRË! Sot, nesër dhe gjithmonë./L.F-dritare.net
