Rama dhe liderët e rajonit në Mal të Zi, mbahet sot Samiti i Procesit të Berlinit
Thursday 22 October 2026, 09:09
Dritare.net
Samiti i Liderëve të Procesit të Berlinit mbahet sot në Miloçer të Malit të Zi, me pjesëmarrjen e kryeministrit Edi Rama, kancelarit gjerman Friedrich Merz dhe drejtuesve të tjerë të rajonit.
Në takim do të jenë të pranishëm kryeministri i Kosovës, Albin Kurti, ai i Maqedonisë së Veriut, Hristijan Mickoski, kryeministri kroat Andrej Plenkoviç dhe kancelari austriak Christian Stocker.
Samiti do të mbledhë gjithashtu zyrtarë të lartë evropianë, mes tyre ministrin e Jashtëm italian Antonio Tajani, ministrin francez për Evropën Benjamin Haddad dhe komisioneren e BE-së për Zgjerimin, Marta Kos.
Në fokus të diskutimeve do të jenë bashkëpunimi rajonal dhe integrimi evropian. Kos pritet të zhvillojë takime me presidentin e Malit të Zi, Jakov Milatoviç, dhe kryetarin e Kuvendit, Andrija Mandiç, për procesin e anëtarësimit në BE dhe reformat e nevojshme.
Në samit pritet të marrin pjesë edhe përfaqësues të Bankës Botërore, Bankës Evropiane të Investimeve dhe Bankës Evropiane për Rindërtim dhe Zhvillim./dritare.net
