Këtë të shtunë mbahet seanca e parë e Kuvendit të dalë nga zgjedhjet e 25 qershorit. Seanca e parë do të fillojë në orën 10:00, gjatë së cilës do të verifikohen mandatet e deputetëve. Ndërsa në seancën e dytë të orës 18:00, do të bëjnë betimin deputetët si dhe do të zgjidhet kryetari i ri i Kuvendit. Kryeministri Rama u bëri thirrje demokratëve që të votojnë Gramoz Ruçin, por PD dhe LSI kanë paralajmëruar se do të votojnë kundër.
Po ashtu, edhe Kosova pasi zgjodhi kryeparlamentarin e ri, Kadri Veselin, sot do të zgjedhë qeverinë së re. Kuvendi i Kosovës do të mbajë një seancë të jashtëzakonshme në orën 16:00.
“Është seancë e jashtëzakonshme, do të jetë zgjedhja e qeverisë së re të Republikës së Kosovës dhe kryeministrit Ramush Haradinaj. Në të njëjtën kohë do të vazhdojmë, kemi shumë punë. Qeveria e ardhshme ka shumë punë Kosova do të vazhdojë orientimin e vet euroatlantik”, ka thënë Veseli./L.P.- Dritare.net
