U mbyt pasi shpëtoi dy turistët, gjendet pas 48 orësh kërkime trupi i kapitenit Arben Anamali
E Enjte 10 Korrik 2025, 08:08
Dritare.net
Pas rreth 48 orësh kërkime intensive, është gjetur trupi i pajetë i kapitenit të anijes turistike, Arben Anamali, i cili humbi jetën në përpjekje për të shpëtuar dy turistë të huaj nga mbytja në liqenin e Shkodrës.
Ngjarja e rëndë ndodhi të enjten në mëngjes, kur 15 turistë të nisur nga Shiroka vendosën të hynin në ujë për të notuar, pavarësisht paralajmërimit të kapitenit për rrezikun që paraqiste era e fortë nga veriu.
Vetëm pak minuta pas hyrjes në ujë, disa prej turistëve u përfshinë nga paniku dhe kërkuan ndihmë, pasi ishin shtyrë rreth 50 metra larg anijes nga dallgët. Kapiteni Anamali u hodh menjëherë në liqen me dy kamerdare shpëtimi dhe arriti të nxjerrë dy prej tyre në bordin e anijes. Fatkeqësisht, ai vetë nuk mundi të kthehej, pasi era e fortë e tërhoqi drejt thellësisë.
Trupi i tij u gjet gjatë ditës së tretë të operacionit të kërkimit, që nisi në orët e para të mëngjesit të së enjtes, me angazhimin e forcave lokale dhe njësive të specializuara në kërkim-shpëtim.
Arben Anamali ishte punësuar si kapiten nga Bashkia e Shkodrës më 1 maj 2024, në kuadër të nisjes së aktivitetit turistik me anijet “Buna” dhe “Drini”, duke dhënë ndihmesën e tij në promovimin e turizmit në liqenin më të madh të Ballkanit./L.F-dritare.net
