National Geographic: Riviera Shqiptare, perfekte për një udhëtim me makinë
E Hënë 7 Korrik 2025, 12:12
Dritare.net
E shtrirë përgjatë bregdetit jugperëndimor të Shqipërisë, nga qyteti i Vlorës deri në fshatin piktoresk Ksamil, Riviera Shqiptare është cilësuar nga mediat ndërkombëtare si “Maldivet e Europës”. Me plazhe me rërë të bardhë dhe ujëra të kaltërta që shndrisin në diell, ky destinacion ofron shumë më tepër sesa një pushim në det është një përzierje e mrekullueshme e historisë, kulturës tradicionale dhe natyrës së paprekur.
Si të shkoni?
Falë linjave të reja ajrore direkte nga Mbretëria e Bashkuar në Tiranë, udhëtimi drejt Rivierës Shqiptare është më i lehtë se kurrë. Nga kryeqyteti, mund të udhëtoni me makinë për rreth dy orë deri në Vlorë, ku nis aventura përgjatë rrugës bregdetare SH8, me pamje mahnitëse të detit Jon në krahun tuaj.
Dita 1: Historia dhe fshatrat në kodra
Mëngjesi në Vlorë
Udhëtimin e filloni në Vlorë, qyteti i tretë më i madh në vend dhe vendlindja e pavarësisë shqiptare. Në Sheshin e Flamurit ndodhet Monumenti i Pavarësisë, aty ku në vitin 1912 u ngrit për herë të parë flamuri kombëtar. Një shëtitje përgjatë Bulevardit “Ismail Qemali” ju çon drejt Muzeut Kombëtar të Pavarësisë, ku mund të njiheni me momentet kyçe të historisë shqiptare.
Dreka në Radhimë
Pesë milje në jug ndodhet fshati bregdetar Radhimë, ku mund të shijoni një drekë të freskët me prodhime deti në “Qendra e Peshkimit”, me pamje nga porti i vogël.
Pasdite në Parkun Kombëtar të Llogarasë
Një orë më në jug ndodhet Parku Kombëtar i Llogarasë. Ndiqni shtigjet e njohura si “Qafa e Cezarit”, rrugë që thuhet se e përshkoi Jul Cezari gjatë ndjekjes së Pompeut. Shtegu kalon nëpër pyje me pisha dhe ofron pamje spektakolare mbi Gjirin e Vlorës.
Mbrëmje në Qeparo
Pas një ndalese në kalanë e Porto Palermos — ndërtuar në vitin 1804 nga Ali Pashë Tepelena — shijoni perëndimin e diellit në shëtitoren bregdetare të fshatit Qeparo Fushë. Një koktej mojito në “Sunset Boulevard” është ideale për të mbyllur ditën. Më pas, drejtohuni në fshatin e vjetër Qeparo Fshat për një darkë tradicionale në restorantin “Ida & Xhorxhi”, ku ushqimi i gatuar me dashuri dhe raki artizanale do t'ju mbeten gjatë në kujtesë.
Dita 2: Ujëra të kristalta dhe thesare të fshehura
Mëngjes në fshat
Pas një mëngjesi me petulla të ngrohta dhe kafe turke, eksploroni rrugicat me kalldrëm të Qeparo Fshat, ku shumë shtëpi të braktisura po rindërtohen për të ruajtur karakterin autentik të zonës.
Plazhi i Bunecit
Nisuni drejt plazhit të fshehur të Bunecit, ku mund të notoni në ujëra të qeta, të merrni me qira një kajak apo një paddleboard dhe të eksploroni gjirin. Për drekë, ndaloni në “Taverna Nikolas” për peshk të freskët nën një çati me kashtë.
Pasdite në Syri i Kaltër
Më pas, vizitoni Syrin e Kaltër, një burim natyror magjepsës që del nga thellësitë e lumit Bistricë. I ndaluar për turistët gjatë regjimit komunist, sot është një ndër atraksionet më të dashura në jug të Shqipërisë. Edhe pse noti nuk lejohet në burim, mund të freskoheni më poshtë në lumë.
Mbrëmje në Liqenin e Butrintit dhe Ksamil
Përfundoni ditën me një udhëtim me varkë në Liqenin e Butrintit me fermerin lokal Soraldo Nebo, i cili do t’ju tregojë procesin e kultivimit të midhjeve. Pasi të shijoni specialitetet me verë të bardhë shqiptare, drejtohuni për në Ksamil. Në Kep Merli, një resort i fshehur me një plazh privat me hyrje të kufizuar, mund të përfundoni ditën duke pirë një koktej në rërën më të butë të Rivierës.
3 Site Arkeologjike që nuk duhen humbur
Orikumi
I vendosur në jug të Gjirit të Vlorës, Orikumi ka qenë një port i rëndësishëm tregtar që nga shekulli i VI p.e.s. Rrënojat përfshijnë një teatër grek, mure bizantine dhe gjurmë romake — madje edhe Jul Cezari ndaloi këtu gjatë fushatës kundër Pompeut.
Finiqi
Pranë Sarandës, Finiqi ofron pamje panoramike mbi fushat dhe lugina përreth. Me teatër helenistik dhe mbetje të blloqeve të lashta, ky vend është gjithashtu shtëpia e disa bunkerëve komunistë që sot mund të eksplorohen.
Butrinti
Një sit i Trashëgimisë Botërore të UNESCO-s me mbi 2,500 vjet histori, Butrinti është një qytet antik ku përplasen kulturat greke, romake, bizantine dhe veneciane. Me ujësjellës romak, teatro, forume dhe mure mbrojtëse madhështore, Butrinti është një ndër perlat më të çmuara arkeologjike të Shqipërisë.
Një fundjavë s’mjafton… por është një fillim
Riviera Shqiptare ofron gjithçka — nga plazhe të mrekullueshme deri te thesare historike dhe fshatra me traditë. Edhe pse mund të vizitoni disa prej pikave kryesore për një fundjavë, zbulimi i vërtetë nis kur vendosni të qëndroni më gjatë, të ecni më thellë dhe të shijoni çdo detaj të kësaj mrekullie shqiptare./L.F-dritare.net
