Trump i shkurtoi afatin për armëpushim Putinit, reagon Kremlini
E Martë 29 Korrik 2025, 18:06
Dritare.net
Kremlini reagoi shkurtimisht të martën pas paralajmërimit të presidentit amerikan Donald Trump për vendosjen e sanksioneve të reja ndaj Rusisë, nëse Moska nuk bën përparim drejt një armëpushimi në Ukrainë brenda 10 deri në 12 ditë.
“Ne e kemi marrë parasysh deklaratën e djeshme të Presidentit Trump. Operacioni special ushtarak vazhdon”, deklaroi zëdhënësi i Kremlinit, Dmitry Peskov, duke iu referuar luftës në Ukrainë me terminologjinë zyrtare të përdorur nga Moska.
Trump, gjatë një vizite në Mbretërinë e Bashkuar të hënën, deklaroi se “nuk ka arsye për të pritur më”, duke shprehur zhgënjim për mungesën e përparimit nga ana e presidentit rus Vladimir Putin drejt një marrëveshjeje paqeje. “Thjesht nuk shohim të bëhet ndonjë përparim”, tha Trump, duke shtuar se është gjithnjë e më pak i interesuar të zhvillojë biseda të mëtejshme me liderin rus.
Që nga rikthimi në Shtëpinë e Bardhë në janar, Trump ka zhvilluar gjashtë telefonata me Putinin, por deklaratat e tij të fundit shënojnë një ndryshim të qartë të qëndrimit të mëparshëm. Më 14 korrik, ai paralajmëroi sanksione të mundshme ndaj Rusisë dhe aleatëve të saj ekonomikë brenda një periudhe 50-ditore, e cila përfundon në fillim të shtatorit. Megjithatë, ultimatumi i ri shkurton ndjeshëm këtë afat.
Në deklaratën e tij, Peskov theksoi se Rusia mbetet e përkushtuar ndaj një procesi paqeje për zgjidhjen e konfliktit në Ukrainë, por nuk ofroi asnjë koment të mëtejshëm mbi afatin e vendosur nga presidenti amerikan.
