Shqipëria ka tri miniera ari! Ja ku ndodhen! Flet studiuesi!
E Mërkurë 30 Korrik 2025, 18:06
Dritare.net
Në një intervistë për emisionin “Dekalog” me Roland Qafokun në DritareTV, Genc Hoti, specialist në fushën e kërkimeve minerare, ka bërë një deklaratë të fortë lidhur me pasuritë e nëndheshme të Shqipërisë. Sipas tij, në vend ekzistojnë tre miniera të arit, por vetëm një prej tyre është zyrtarisht e njohur dhe po shfrytëzohet në mënyrë të ligjshme.
“Miniera e Babjes është e vetmja që është zbuluar, e dokumentuar dhe aty po punohet në mënyrë të ligjshme,” tha Hoti në intervistë. Kjo minierë ndodhet në qarkun e Elbasanit dhe ka qenë objekt i kërkimeve të vazhdueshme për dekada.
Por përveç Babjes, Hoti zbuloi edhe dy vendndodhje të tjera ku, sipas tij, ndodhen rezerva të konsiderueshme ari: njëra midis Këlcyrës dhe Përmetit dhe tjetra në zonën e Tomoricës. Sipas Hotit, këto dy zona nuk janë ende të eksploruara apo të certifikuara në mënyrë zyrtare, pavarësisht potencialit të lartë mineral që mbartin.
“Janë tre zona që i njohim mirë: Babja, Këlcyra–Përmeti dhe Tomorica. Por vetëm Babja është futur në sistem. Të tjerat mbeten jashtë kontrollit shtetëror,” u shpreh ai.
Deklarata e Genc Hotit hedh dritë mbi një temë të ndjeshme për ekonominë shqiptare: mungesën e një strategjie të qartë shtetërore për shfrytëzimin e pasurive natyrore. Ai theksoi se mungesa e transparencës dhe e ndërhyrjes institucionale bën që burime të vlefshme të mbeten të pashfrytëzuara ose të bien pre e aktiviteteve të paligjshme.
“Duhet të ketë vullnet politik dhe investim serioz për të eksploruar dhe certifikuar këto miniera. Ato janë pasuri e Shqipërisë dhe nuk mund të rrinë në harresë apo në duart e spekulantëve,” theksoi Hoti.
