Ndahet nga jeta rekordmeni olimpik i peshëngritjes, Ymer Pampuri

Është ndarë nga jeta ditën e sotme legjenda e peshëngritjes shqiptare, Ymer Pampuri. Pas një ataku kardiak, zemra e tij ndaloi së rrahuri në moshën 73 ­vjeçare. Pampuri është kampioni i parë dhe i vetëm olimpik i Shqipërisë teksa në Olimpiadën e Mynihut në vitin 1972 mori medaljen e artë në peshëngritje në stilin e forcës me 127.5 kilogramë të ngitura.

Ky rezultat ishte rekord olimpik për kohën dhe është akoma dhe sot në fuqi i pathyer duke qënë se stili i forcës nuk praktikohet më në peshëngritje. Përveç medaljeve të shumta të fituar në karrierën e tij që zgjati deri në vitin 1981, atij i janë akorduar edhe titujt “Mjeshtër i Madh i Punës” dhe “Naim Frashëri” i klasit të parë.