Menu Krishtlindjeje
Për 8 persona
Antipasta:
Brusketa me gjalpë dhe salmon
Kumbulla të thata me proshutë të tymosur dhe djathë dhie
Sallatë Niccolo “Pjata e parë”
Ravioli me gjalpë dhe salvia/ sherebelë
Pjata e dytë
Rosto gjeli deti i mbushur me pazi dhe gjizë pa kripë dhe kërpudha porcini
Ëmbëlsirë
Millefeuille me Pandoro dhe krem Zabaione
Akullore me fëstëkë
Vera shoqëruese për antipastën dhe Pjatën e Parë dhe të Dytë: Farnese, Montepulciano D’Abbruzzio DOC
Vera shoqeruese e ëmbëlsirave: Passito di Pantelleria DOC
Brusketa me gjalpë dhe salmon
Përbërësit:
1 bukë (Baguette e gjatë)
80 gr gjalpë (pa kripë)
200 gr salmon i tymosur
1 limon (lëngu)
Kopër e fresket
Përgatitja:
Prejeni salmonin e tymosur në feta dhe vendoseni në një enë me lëng limoni që të marinohet për rreth 1 orë. Prejeni bukën në feta të holla dhe vendosini në furrën e ngrohur më parë për rreth 5 deri në 6 minuta.
Më pas, lyejini me gjalpë të gjithë fetat e bukës dhe vendosni mbi secilën prej tyre nga një copë salmoni të tymosur. regullojini me kopër të prerë dhe janë gati për t’u servisur.
Kumbulla të thata me proshutë të tymosur dhe djathë dhie
Përbërësit:
200 gr kumbulla të thata (pa farë)
100 gr pastërma e tymosur (ose pançetë)
50 gr djathë dhie (Pecorino)
Përgatitja:
Fillimisht lajini kumbullat mirë dhe thajini ato me një pecetë. Ndajini përgjysmë dhe vendosni mbi secilën prej tyre nga një copë të vogël djathi. Më pas, mbështillini me nga një fetë pastërma (ose pancetë) dhe fiksojini me një kruajtëse dhëmbësh.
Renditini në një enë për pjekje dhe vendosini në furrë të piqen për rreth 10 minuta në temperaturën 200 gradë. Servirini të ngrohta.
Sallatë Niccolo
Përbërësit:
300 gr sallatë jeshile
1 dardhë (e prerë hollë)
1 shegë
50 gr fara luledielli (të pjekura)
Vaj ulliri
Pak djath Parmigiano reggiano (në feta të holla)
Uthull balsamike
Vaj ulliri
Kripë
Përgatitja:
Prejeni sallatën jeshile dhe dardhat në feta të holla dhe vendosini në një tas të madh. Qëroni shegën dhe kokrrat e saj hidhini në tasin me sallatë dhe dardha.
Hidhni më pas në të edhe farat e lulediellit, fetat e djathit dhe kripën. Spërkatini në fund me pak vaj ulliri dhe uthull balsamike dhe sallata është gati për t’u servirur.
Ravioli me gjalpë të freskët dhe sherebelë (salvia)
Përbërësit:
800 gr ravioli (të mbushura me mish të grirë)
200 gr gjalpë (i freskët)
20 gjethe sherebelë
1 lugë gjelle djathë (Parmigiano Reggiano)
Përgatitja:
Merrni gjethet e sherebelës dhe prejini në copa të vogla. Vendosini në një tas, hidhni mbi të gjalpin e freskët dhe përziejini mirë. Shtoni raviolit në një tenxhere me ujë të vluar dhe kripë dhe lërini të ziejnë. Në të shtoni edhe një lugë gjelle vaj ulliri në mënyrë që të mos ngjisin. Vendosni një tigan në zjarr dhe në të shtoni përzierjen e gjalpit me gjethe sherebele.
Largojini raviolit nga zjarri, kullojuni ujin e tepërt dhe shtojini në tigan. Përziejini mirë të gjithë përbërësit dhe transferojini në një pjatë për servirje. Rregullojini me pak djathë të grirë dhe me gjethe sherebelë.
Rosto gjeli deti i mbushur me pazi, gjizë pa kripë dhe kërpudha porcini
Përbërësit:
2 kg gjel deti ( pjesa e gjoksit, fileto)
300 gr spinaq (pazi e zier)
150 gr gjize (pa kripë)
50 gr kërpudha Porcini
1 degë rozmarinë
Vaj ulliri
Kripë
Përgatitja:
Prejeni mishin e gjelit në feta me trashësi rreth 1.5 cm dhe i rrihni mirë me anë të një çekiçi kuzhine, duke u dhënë formën e një trekëndëshi. Vendosini kërpudhat në një enë me ujë të ngrohtë për rreth 15 minuta, dhe më pas kullojuni ujin dhe prejini në feta të holla.
Rregullojini me kripë dhe ndërkohë filloni me përgatitjen e mbushjes së rostos. Në një tigan me vaj ulliri shtoni një degë rozmarine, fetat e kërpudhave, dhe kaurdisini në zjarr të ngadaltë për disa minuta.
Shtoni në të gjethet e prera të spinaqit, pak kripë dhe lërini të gatuhen deri derisa lëngu të ketë shteruar plotësisht. Vendoseni masën e përgatitur në një mikser dhe purenë e përftuar shtojeni në një enë ku keni hedhur gjizën pa kripë.
Përziejini së bashku në mënyrë që të krijoni një masë homogjene. Vendosni mbi çdo copë gjeli deti pak nga masa e përgatitur dhe më pas mblidhini ato në formë roleje.
Lidhini të gjithë roletë e përgatitura me spango kuzhine. Lyejini me pak gjalpë dhe mëbshtillini me letër alumini. Vendosini në një enë për pjekje dhe vërini në furrë të piqen.
Millefeuille me Pandoro dhe krem Zabaione
Përbërësit:
1 Kek Pandoro
Per kremin Zabaione:
3 vezë (të kuqe)
1 vezë (e bardha)
3 lugë gjelle sheqer ( 75 gr)
3 luge gjelle verë Marsala
1 lugë gjelle verë e bardhë
Përgatitja:
Për përgatitjen e kësaj ëmbëlsire mjafton të blini një kek Pandoro, i cili gjendet në të gjitha supermarketet gjatë periudhës së festive të fundvitit.
Edhe pse nuk është një ëmbelsirë e trashëguar nga të parët tanë, tashmë këtë 10-vjeçarin e fundit është bërë traditë Panetone ose Pandoro.Unë e preferoj në të gjitha mënyrat, por këtë radhë dua ta sjell në një mënyrë të re dhe shumë të shijshme.
Përgatitja e Kremit Zabaione:
Në një tas metalik hidhni tre të kuqet e vezëve dhe sheqerin dhe trazojini me një rrahës metalik për gati 10 minuta. Më pas shtoni verën Marsala dhe atë të bardhë duke vazhduar rrrahjen. Vendoseni tasin mbi një enë me ujë të vendosur në zjarr në banjomari dhe vazhdoni ta trazoni derisa masa të trashet, por jo ta lini të fryhet!
Ndërkohë, shtoni të bardhën e vezëve në një enë dhe rriheni derisa të fryhet si shkumë. Shtojeni në enën ku keni përgatitur kremin me të kuqet e vezëve dhe trazojini së bashku derisa të formohet një masë homogjene.
Prisni në mënyrë tërthore në feta 1cm kekun Pandoro. Me anë të një forme krijoni 2-3 copa të vogla dhe i shtroni duke i lyer shumë me krem Zabaione dhe vendosini mbi njëra-tjetrën.
Dekorojeni me copëza çokollate të zezë dhe me 2 lugë akullore me fëstëkë. /shije
