Ismail Qemali u helmua përmes kafesë? Dëshmia e shërbëtores që u zhduk bashkë me ditarin!
Tuesday 25 August 2026, 16:04
Dritare.net
Bazuar në librin “100 vrasjet më të bujshme në historinë e shtetit shqiptar” të gazetarit dhe studiuesit Roland Qafoku, një dëshmi e fortë ngre dyshime mbi vdekjen e Ismail Qemalit në Peruxhia të Italisë, në vitin 1919.
Fatush Shedula, shërbëtorja e familjes Vlora, kishte shkruar në ditarin e saj se themeluesi i shtetit shqiptar ishte helmuar nëpërmjet kafesë. Ajo ishte një nga personat që njihte rrethanat e ditëve të fundit të Ismail Qemalit dhe dëshmia e saj mund të ndihmonte në zbardhjen e misterit.
Por edhe fati i shërbëtores rezultoi tragjik. Fatush Shedula u gjet e helmuar në Tiranë gjatë viteve ’30, ndërsa ditari i saj origjinal u zhduk pa lënë gjurmë. Këto rrethana shtojnë dyshimet se dikush mund të ketë tentuar të eliminonte dëshmitaren dhe të zhdukte provat që lidhnin vdekjen e Ismail Qemalit me një helmim të qëllimshëm.
Versioni zyrtar thotë se Ismail Qemali ndërroi jetë nga një hemorragji cerebrale. Megjithatë, dëshmia e shërbëtores, simptomat e shfaqura pas konsumimit të kafesë dhe paqartësitë në dokumentet mjekësore vijojnë të ngrenë pikëpyetje mbi atë që ndodhi realisht në Hotel Brufani të Peruxhias.
