BTS tërhiqet nga Grammy 2027: Muzika nuk duhet të ndahet sipas gjuhës apo rajonit
Wednesday 29 July 2026, 19:07
Dritare.net
Grupi koreano-jugor BTS ka njoftuar se nuk do të marrë pjesë në çmimet Grammy 2027, një vendim që vjen vetëm një muaj pas prezantimit të një kategorie të re për muzikën pop aziatike. Të shtatë anëtarët e grupit publikuan të njëjtin mesazh në rrjetet sociale, ku shpjeguan arsyen e vendimit.
“Kemi vendosur të mos hyjmë në Grammy këtë vit. Shpresojmë që muzika të dëgjohet dhe të dashurohet për atë që është, jo të ndahet sipas rajonit apo gjuhës”, thuhej në deklaratën e tyre.
Vendimi i BTS vjen në një moment kur grupi pritej të ishte një nga konkurrentët kryesorë në kategoritë më të rëndësishme të Grammy-t, përfshirë albumin e vitit, pas suksesit të albumit të tyre Arirang dhe këngës kryesuese “Swim”, e cila arriti vendin e parë në SHBA.
Megjithatë, kënga nuk do të mund të konkurronte në kategorinë e re “Best Asian Pop Music Performance”, pasi rregullat e Grammy-t kërkojnë që këngët e nominuara të kenë “përdorim domethënës” të një gjuhe aziatike. Mbi 80% e teksteve të albumit Arirang janë në anglisht.
Krijimi i kësaj kategorie të re ka shkaktuar reagime të përziera mes fansave të muzikës K-Pop. Shumë prej tyre kanë kritikuar faktin se artistët aziatikë po ndahen në një kategori më vete, në vend që të konkurrojnë në mënyrë të barabartë me pjesën tjetër të industrisë muzikore.
BTS, i përbërë nga RM, Jimin, V, Suga, Jungkook, Jin dhe J-Hope, e mbylli mesazhin me një falënderim për fansat e tyre, të njohur si “BTS Army”.
Grupi është një nga emrat më të mëdhenj të muzikës botërore dhe ka marrë pesë nominime në Grammy që nga viti 2020, por nuk ka fituar asnjë çmim. Ata ishin grupi i parë K-Pop që u nominua për Grammy në vitin 2021 me këngën “Dynamite”.
Akademia e Regjistrimit, organizatorja e Grammy-ve, ende nuk ka reaguar zyrtarisht ndaj vendimit të BTS./dritare.net
