Trump: Bisedimet me Putinin për përfundimin e luftës në Ukrainë, po shkojnë mirë
E Hënë 24 Shkurt 2025, 19:07
Dritare.net
Presidenti amerikan Donald Trump ka zbuluar se është në bisedime me presidentin rus Vladimir Putin për t'i dhënë fund luftës në Ukrainë.
Në një postim të hënën, pak para takimit të tij në Shtëpinë e Bardhë me presidentin francez Emmanuel Macron, Trump i referohet videokonferencës së liderëve të G7 që u zhvillua sot.
Në postimin e tij, Trump shkruan se “sot presidenti francez Emmanuel Macron u takua me mua në Zyrën Ovale për të folur në Samitin e G7. Takimi u thirr nga kryeministri kanadez Justin Trudeau, presidenti aktual i G7, për të njohur përvjetorin e tretë të luftës Rusi-Ukrainë, e cila nuk do të kishte filluar kurrë nëse do të kisha qenë president”.
Ai shtoi se "të gjithë shprehën qëllimin e tyre për të parë përfundimin e luftës dhe unë theksova rëndësinë e "Marrëveshjes së Mineraleve Kritike dhe Tokave të Rralla midis Shteteve të Bashkuara dhe Ukrainës, e cila shpresojmë se do të nënshkruhet shumë shpejt! Kjo marrëveshje, e cila është një "Partneritet Ekonomik", do të sigurojë që populli amerikan të rikuperojë dhjetëra miliarda dollarë dhe pajisjet ushtarake të dërguara në Ukrainë, duke ndihmuar gjithashtu rritjen e ekonomisë së Ukrainës ndërsa kësaj lufte barbare dhe të egër i vjen fundi. Në të njëjtën kohë, jam në diskutime serioze me presidentin rus Vladimir Putin për përfundimin e luftës, por edhe për transaksionet e mëdha të zhvillimit ekonomik që do të ndodhin midis Shteteve të Bashkuara dhe Rusisë. Bisedimet po shkojnë shumë mirë!", thotë Trump./K.C/dritare.net
