SHBA mbështet Rusinë në rezolutat e OKB-së për Ukrainën
E Martë 25 Shkurt 2025, 18:06
Dritare.net
SHBA ka qenë dy herë në anën e Rusisë në votat në Kombet e Bashkuara për të shënuar përvjetorin e tretë të pushtimit të Ukrainës, duke theksuar ndryshimin e qëndrimit të administratës Trump ndaj luftës.
Së pari, SHBA-ja kundërshtoi një rezolutë të hartuar nga evropianët që dënon veprimet e Moskës dhe mbështet integritetin territorial të Ukrainës, duke votuar në të njëjtën mënyrë si Rusia dhe vendet përfshirë Korenë e Veriut dhe Bjellorusinë në Asamblenë e Përgjithshme të OKB-së (UNGA) në Nju-Jork.
Më pas SHBA-ja hartoi dhe votoi për një rezolutë në Këshillin e Sigurimit të OKB-së, e cila kërkonte fundin e konfliktit, por nuk përmbante asnjë kritikë ndaj Rusisë.
Këshilli i Sigurimit e miratoi rezolutën, por dy aleatet kryesore të SHBA-së, Mbretëria e Bashkuar dhe Franca, abstenuan pasi përpjekjeve të tyre për të ndryshuar formulimin iu vu veto.
Rezolutat e OKB-së u paraqitën ndërsa Presidenti francez Emmanuel Macron vizitoi Presidentin Donald Trump në Shtëpinë e Bardhë në një përpjekje për të adresuar dallimet e tyre të mprehta për luftën.
Të enjten, kryeministri britanik Sir Keir Starmer do të vizitojë gjithashtu liderin e ri amerikan.
Shtëpia e Bardhë e Trump ka përmbysur aleancën transatlantike, duke fituar favorin e Moskës dhe duke hedhur dyshime mbi angazhimin afatgjatë të Amerikës për sigurinë evropiane.
Diplomatët evropianë paraqitën një tekst më të detajuar, duke fajësuar Rusinë për pushtimin e saj në shkallë të plotë dhe duke mbështetur sovranitetin dhe integritetin territorial të Ukrainës.
“Ne duhet të rikonfirmojmë se agresioni duhet të dënohet dhe diskreditohet, jo të shpërblehet.”, tha zëvendësministrja e Jashtme e Ukrainës, Mariana Betsa.
Anëtarët e OKB-së e mbështetën rezolutën evropiane me 93 vota. SHBA-të nuk abstenuan, por në fakt votuan kundër saj, së bashku me Rusinë, Izraelin, Korenë e Veriut, Sudanin, Bjellorusinë, Hungarinë dhe 11 shtete të tjera, me 65 abstenime.
OKB-ja miratoi gjithashtu rezolutën e SHBA-së, por vetëm pasi ajo u ndryshua për të përfshirë gjuhën që mbështeste Ukrainën, gjë që çoi në abstenimin e SHBA-së. Rrallëherë SHBA ka qenë kaq në kundërshtim me aleatët e saj evropianë.
Që kur Rusia pushtoi Ukrainën tre vjet më parë, Këshilli i Sigurimit është bllokuar nga fuqia e Rusisë, një nga pesë anëtarët e saj të përhershëm, për të vënë veton ndaj çdo rezolute atje.
Për këtë arsye OKB-ja ka qenë forumi kryesor për debatimin e luftës. Por rezolutat e tij nuk janë ligjërisht detyruese për shtetet anëtare, ndryshe nga ato të Këshillit të Sigurimit./K.C/dritare.net
