A duhet të hamë 30 bimë në javë? Ja çfarë thotë shkenca për trendin e ri të shëndetit
Monday 13 July 2026, 20:08
Dritare.net
Një këshillë ushqimore që është bërë shumë e përhapur vitet e fundit sugjeron se konsumimi i 30 llojeve të ndryshme bimësh në javë mund të përmirësojë shëndetin e zorrëve. Por ekspertët thonë se kjo shifër nuk është një rregull magjik.
Ideja vjen nga një studim i vitit 2018, ku morën pjesë më shumë se 10 mijë persona nga SHBA, Britania e Madhe dhe Australia. Pjesëmarrësit raportuan ushqimet që konsumonin dhe dhanë mostra të jashtëqitjes për analizimin e mikroorganizmave në zorrë.
Studiuesit zbuluan se personat që konsumonin më shumë se 30 lloje ushqimesh bimore në javë kishin një mikrobiomë të zorrëve më të larmishme krahasuar me ata që konsumonin më pak se 10 lloje.
Megjithatë, shkencëtarët theksojnë se numri 30 nuk duhet parë si një kufi i prerë. Sipas profesor Daniel M. Davis nga Imperial College London, kjo shifër është disi arbitrare dhe nuk do të thotë se dikush që ha 30 bimë ka domosdoshmërisht shëndet më të mirë se dikush që ha 25.
“Fakti që njerëzit hanë më shumë se 30 bimë në javë nuk do të thotë se vetëm kjo është arsyeja e shëndetit të tyre”, shpjegojnë ekspertët. Persona të tillë mund të kenë edhe zakone të tjera të shëndetshme, si aktivitet fizik, gjumë më të mirë dhe më pak stres.
Studiuesit ende nuk e dinë saktësisht se si duket një “mikrobiomë perfekte” dhe nuk ka prova të drejtpërdrejta që konsumimi i 30 bimëve në javë parandalon sëmundje të caktuara.
Ekspertët paralajmërojnë gjithashtu për përdorimin komercial të këtij trendi, pasi tregu është mbushur me suplemente që premtojnë përmirësimin e mikrobiomës, por pa prova të forta shkencore për efektivitetin e tyre.
Ajo që dihet me siguri është se një dietë e pasur dhe e larmishme me fruta, perime, bishtajore, arra dhe drithëra integrale është një zgjedhje e mirë për shëndetin.
Pra, nuk është e nevojshme të numëroni me patjetër 30 bimë çdo javë, më e rëndësishme është shumëllojshmëria dhe cilësia e ushqimit që konsumoni./l.F-dritare.net
