Të prezantohesh në Francë me një pjatë groshë

Nga Edlira Ruzi

Nga vitet `90 e këtej, kuzhina shqiptare ka bërë hapa gjigante. Ajo është pasuruar si në produkte ashtu edhe në teknika. Kur më qëllon të flas me shokët e mi për gatimin dhe për pjatat që ata dinë të përgatisin më mirë, shumë prej tyre më përgjigjen: pastat. S’më pëlqen pasta. Dikur “pasta” u thoshim ëmbëlsirave me pandispanjë, me disa shtresa kremi 🙂 Unë vetë preferoj të them brumëra ose thjesht makarona. Por a mund të prezantohet kuzhina shqiptare me një pjatë makaronash? Nëse do të kishit një mik të huaj për drekë, çfarë do i gatuanit?

Në këtë dilemë besoj ka qenë edhe shefi i ri Armand Hasanpapaj kur ju desh të prezantonte Shqipërinë në Refugee Food Festival, në Francë. Bëhej fjalë për një javë gjatë së cilës shefa nga vende të ndryshme gatuanin specialitetet e origjinës së tyre për një klientelë franceze. Armandi gatoi së bashku me nënën e tij, një menu tërësisht shqiptare, në një nga restorantet e Lionit.

Kur pashë menunë e përgatitur prej tyre, pata një befasi të këndshme. E kishit menduar se kuzhina shqiptare do të prezantohej në Francë me një pjatë groshë? Më duket interesante ideja për të përfshirë groshët, një pjatë të cilës s’mund t’i thotë jo asnjë shqiptar i vërtetë. Por groshët e shef Armandit i përlanë edhe francezët.

LEXO DHE :  Disa ide fantastike, si ta dekoroni shtëpinë me kavanoza për vjeshtë!

Ata së bashku me pjatat e tjera, të cilat shefi i përgatiti me mamanë e tij, Fatimen, patën sukses në javën e ushqimit të emigrantëve.

Pjata e pritjes që i paraprin të parës, e quajtur ndryshe Amuse Bouche, ishte përgatitur me role pastërmaje viçi, të mbushur me speca të skuqur e djathë, mbi një shtrat supë të ftohtë bizelesh. Pas saj u shërbyen dy lloj byrekësh, njeri me spinaq e djathë, tjetri me gjizë, ullinj të zinj, salcë domatesh dhe turshi. Pjata kryesore përbëhej nga groshët e shoqëruara me qofte me mish qengji dhe perime të pjekura.

Dhe në fund gjithçka u mbyll ëmbël me “Bakllavanë e Fatimes”, me krem fëstëk, reçel kajsie dhe kajsi të përpunuar.

E ç’mund të thuash pas bakllavasë së Fatimes? Thjesht, ju bëftë mirë dhe mirëulexofshim në të tjera aktivitete të këtij lloji./dritare.net



PËRGJIGJU

Please enter your comment!
Please enter your name here

This site uses Akismet to reduce spam. Learn how your comment data is processed.