Nga Dritan Hila
Disa nga shikuesit që ndjekin emisionin 'E premte 8 pa 5' na akuzojnë se titujt janë pak 'clickbait', pra ndjellës klikimesh. Meqë titujt i vendos unë, dua të sqaroj që emisioni, së pari, është shumë serioz dhe si i tillë tallet me turbonacionalistët që Shqipërinë e mendojnë si kërthizën e botës. Botës i mjaftojnë idiotët e Greqisë që e mendojnë veten të tillë, ndaj nuk ka nevojë edhe Shqipëria të kalojë në overdozë. Kjo pasqyrohet edhe në titujt që janë sarkastikë, por gjithmonë seriozë. Edhe ky i fundit kishte brenda talljen me turbofolkun, por edhe situatën ku është bota dhe çfarë po ndodh në oborrin perandorak të Trump dhe si po, dhe do të, reflektohet në fshatin tonë. Jemi duke u përpjekur të bëjmë një emision që nuk është formati i studiove televizive, ku injorantët e palexuar analizojnë, apo talk show ku tallen dhe ku bëhet humor banal. Është një bashkëbisedim i çliruar nga prangat e politikës, pa synime votash dhe promovimi personazhesh. Unë dhe Amarildo besojmë në atë që themi pa qenë të detyruar të jemi dakord dhe nganjëherë tallemi edhe me veten apo të shkuarën tonë, dhe në të cilin diskutimi i të premtes vjen pas një jave leximesh, ndjekje analizash të ekspertëve amerikanë, britanikë dhe italianë, të kaluara në filtrin e një 'maloku' dhe një 'labi gjysmë opinge', që duan që ky vend të jetë normal dhe që këtë vend nuk e ndërrojmë me asnjë tjetër./dritare.net
