Lideri i ri suprem i Iranit, Mojtaba Khamenei, ka lëshuar deklaratën e tij të parë publike që nga marrja e pushtetit, duke paralajmëruar për përshkallëzim të mëtejshëm të tensioneve me Shtetet e Bashkuara dhe aleatët e tyre në rajon. Deklarata e tij u lexua në televizionin shtetëror iranian nga një prezantues, ndërsa vetë lideri nuk është shfaqur publikisht.
Në mesazhin e tij, Khamenei tha se Irani duhet të vazhdojë të përdorë si “mjet presioni” bllokimin e ngushticës strategjike të Hormuzit, një nga rrugët më të rëndësishme të transportit të naftës në botë. Sipas tij, kjo është një levë që Teherani duhet ta mbajë për të detyruar kundërshtarët të tërhiqen.
Ai theksoi gjithashtu se Irani synon të ruajë “politikë miqësie” me vendet fqinje, por paralajmëroi se bazat ushtarake amerikane në rajon duhet të mbyllen. Në të kundërt, sipas tij, ato do të vazhdojnë të jenë objektiv i sulmeve iraniane.
Paralajmërimi për hakmarrje
Në deklaratë, lideri iranian u zotua gjithashtu për hakmarrje ndaj atyre që ai i quajti sulme kundër civilëve iranianë gjatë konfliktit të vazhdueshëm. Ai tha se Irani nuk do të hezitojë të “hakmerret për gjakun e iranianëve të vrarë”.
Khamenei përmendi veçanërisht një incident në qytetin Minab, ku sipas autoriteteve iraniane një sulm amerikan pranë një shkolle ka vrarë 168 persona, përfshirë rreth 110 fëmijë. Shtetet e Bashkuara kanë deklaruar se po hetojnë.
Konflikti dhe ndikimi global
Deklarata vjen në një moment kur lufta midis Iranit dhe aleatëve perëndimorë ka përshkallëzuar tensionet në rajon dhe ka tronditur tregjet globale të energjisë. Mbyllja ose kufizimi i kalimit në Ngushticën e Hormuzit, ku kalon rreth një e pesta e naftës së botës, ka rritur frikën për krizë energjetike dhe rritje të çmimeve të naftës.
Analistët vlerësojnë se deklarata e parë e liderit të ri iranian sinjalizon një qëndrim të ashpër dhe vazhdim të strategjisë konfrontuese të Teheranit, ndërsa luftimet dhe tensionet në Lindjen e Mesme vazhdojnë./K.C/dritare.net
