Rama: Shqipëria do të përdorë “ushtri dronësh” për monitorimin e pyjeve!
E Shtunë 4 Tetor 2025, 10:10
Dritare.net
Në betejën kundër zjarreve, teknologjia do të jetë aleati kryesor i Shqipërisë. Kryeministri Edi Rama zbuloi një plan ambicioz për modernizimin teknologjik të kapaciteteve të mbrojtjes civile, me një fokus të veçantë te mjetet ajrore pa pilot. 'Do të shtojmë në mënyrë të ndjeshme flotën e dronëve,' deklaroi ai.
Ky investim do të shkojë në dy drejtime kryesore. Së pari, do të porositen dronë të pajisur me kamera termike, të cilët do të përdoren për të monitoruar në kohë reale pyjet, duke mundësuar kapjen e sinjalit të zjarrit në fazat më të hershme të tij. Kjo do të rrisë ndjeshëm shpejtësinë e reagimit. Së dyti, qeveria po vlerëson porositë për 'dronët mbjellës', një teknologji inovative që do të përdoret për ripërtëritjen e shpejtë të territoreve të djegura.
Ky fokus te dronët nuk do të lërë pas dore mjetet tradicionale. Do të vazhdojë fuqizimi i flotës së helikopterëve dhe avionëve zjarrfikës, ndërsa së shpejti do të hapet fizikisht Akademia e Forcave Ajrore në Vlorë për përgatitjen e pilotëve të rinj. Përveç mjeteve ajrore, po punohet për krijimin e sistemeve të hershme të alarmit dhe qendrave të integruara të kontrollit për të siguruar një reagim më të shpejtë edhe me mjetet tokësore. Kjo qasje teknologjike, sipas Ramës, është e domosdoshme për të përballuar një sfidë globale si ndryshimi i klimës, duke marrë shembull nga investimet masive që po bëjnë edhe vende si Greqia, Italia dhe vetë Bashkimi Europian./E.P-dritare.net
