Greqia dhe Turqia përballen me zjarre masive mes valës së të nxehtit ekstrem
E Hënë 28 Korrik 2025, 08:08
Dritare.net
Greqia vazhdon të përballet me zjarre masive në disa rajone të vendit, ndërsa temperaturat ekstreme kanë arritur deri në 42.4°C në pjesën qendrore të vendit të dielën. Megjithatë, shumë prej vatrave janë vënë nën kontroll nga forcat zjarrfikëse pas një beteje intensive gjatë natës.
Aktualisht, përpjekjet për shuarjen e flakëve janë përqendruar në pesë fronte të mëdha zjarri, përfshirë Peloponezin, ishujt Evia, Kythira dhe Kretën. Në Kythira, rreth 20% e sipërfaqes së ishullit është prekur nga zjarri, ndërsa në Evia, situata pranë zonës Pissona është jashtë kontrollit, me gjashtë zjarrfikës të plagosur dhe fshatra të tëra pa energji elektrike.
Në rajonin e Atikës, një zjarr që shpërtheu në zonën e Afidnes u përhap me shpejtësi në Drosopigi, Kryoneri dhe Agios Stefanos, duke detyruar evakuimin e banorëve. Edhe pse fronti kryesor është izoluar, ende raportohen vatra aktive.
Në Kretë, zjarrfikësit po përballen me një front zjarri 20 kilometra të gjatë në rajonin e Chania-s, i cili ka shkatërruar pyje, koshere bletësh, të mbjella dhe bagëti. Erërat e fuqishme jugperëndimore po vështirësojnë përpjekjet për të vënë flakët nën kontroll.
Ndërkohë, edhe Turqia po përballet me zjarre të mëdha në disa rajone të vendit. Temperaturat kanë thyer rekordin historik me 50.5°C të regjistruar në qytetin juglindor Silopi. Në provincën Karabuk, zjarri ka qenë aktiv për katër ditë, ndërsa në Eskisehir, dhjetë persona humbën jetën gjatë përpjekjeve për shuarjen e flakëve.
Ministri turk i Pyjeve, Ibrahim Yumakli, deklaroi se situata mbetet kritike dhe mund të duhen disa ditë për t’i vënë të gjitha vatrat nën kontroll. Në disa rajone, përfshirë edhe destinacionin turistik Çesme, janë vendosur kufizime të përkohshme për përdorimin e ujit.
Ministri grek i krizave klimatike dhe mbrojtjes civile, Giannis Kefalogiannis, deklaroi se dëmet janë të mëdha, me zjarrfikës të lënduar, banesa të shkrumbuara dhe zona të tëra pyjore të shkatërruara.
Greqia ka kërkuar ndihmë nga Mekanizmi i Mbrojtjes Civile të Bashkimit Evropian, duke kërkuar gjashtë avionë për shuarjen e zjarreve, ndërsa ekipet janë në gatishmëri të plotë për të përballuar çdo shpërthim të ri zjarri.
Situata mbetet kritike, me zjarre që pritet të vazhdojnë për shkak të kushteve të motit ekstrem dhe erërave të forta./L.F-dritare.net
