Burak Özçivit viziton Vlorën/ Aktori i famshëm turk pritet me entuziazëm
E Mërkurë 18 Qershor 2025, 14:02
Dritare.net
Vlora përjetoi sot një atmosferë të pazakontë me praninë e aktorit të famshëm turk Burak Özçivit, i cili tërhoqi shumë qytetarë që u dyndën për të bërë fotografi dhe për ta përshëndetur nga afër. Radhët e gjata të qytetarëve, sidomos të rinjve dhe familjeve, krijuan një skenë të rrallë për qytetin bregdetar.
Aktori u prit edhe në zyrën e kryetarit të Bashkisë së Vlorës, Ermal Dredha, i cili ndau emocionet e takimit në një postim në rrjetet sociale:
“Deri sot, nuk kisha parë kaq shumë njerëz në Vlorë, të prisnin në radhë, për të bërë një fotografi me Burak Özçivit. Kënaqësi ta prisja sot në zyrë, bashkë me stafin e bashkisë, dhe të kalonim kohë në Vlorën që i la mbresa të shkëlqyera!”
Vizita e Özçivit në Shqipëri vjen në kuadër të një projekti për promovimin e Vlorës si një destinacion turistik, ku figura të njohura ndërkombëtare angazhohen për të sjellë vëmendje dhe vizitorë të rinj në jug të Shqipërisë.
“Na bënë bashkë projektet që kanë qëllim promovimin e Vlorës si destinacion turistik dhe jo vetëm,” shtoi Dredha, duke theksuar rëndësinë e bashkëpunimeve të tilla për zhvillimin ekonomik dhe kulturor të qytetit.
Prania e aktorit, i njohur për rolet në seriale të suksesshme si “Kuruluş: Osman” dhe “Karasevda”, u bë menjëherë virale në rrjetet sociale, duke rritur më tej profilin ndërkombëtar të Vlorës.
Vizita pritet të pasohet nga aktivitete dhe fushata të tjera promovuese që synojnë të pozicionojnë Vlorën si një qendër të rëndësishme të turizmit mesdhetar./L.F-dritare.net
