Begaj dekreton Ramën si kryeministër, kreu i qeverisë përgjegjës edhe për Diellën
E Premte 12 Shtator 2025, 13:01
Dritare.net
Presidenti Bajram Begaj ka dekretuar Edi Ramën si kryeministër të qeverisë së re të dalë nga zgjedhjet e 11 majit.
Tashmë Rama do t’i paraqesë presidentit listën e emrave të kabinetit “Rama 4”, me 16 ministra që do të dekretohen një nga një nga Kreu i Shtetit. Dekretet do të kalojnë më pas në Kuvend, ku do të shqyrtohen bashkë me programin qeverisës. Pas miratimit, ministrat do të kryejnë betimin para presidentit Begaj.
Në dekretin e firmosur nga Begaj, në nenin 2 shkruhet se Kryeministri ushtron dhe përgjegjësinë për ngritjen dhe funksionimin e ministrit te inteligjencës artificiale Diella.
Ndërkohë, në seancën e sotme parlamentare që pritet të rifillojë në orën 17:00, të gjithë deputetët e Kuvendit të Shqipërisë do të bëjnë betimin për mandatin e ri katërvjeçar.
Një ditë më parë, Rama prezantoi emrat e kabinetit “Rama 4”, i cili do të drejtojë vendin gjatë këtij mandati. Risi e këtij formacioni është ministria e 17-të, që për herë të parë do të ketë në krye një ministre virtuale – Diellën, një inteligjencë artificiale e krijuar për të shërbyer në proceset e prokurimeve publike./L.F-dritare.net
