A është e vërtetë rritja e pensioneve? Ministrja përgjigjet
E Martë 18 Nëntor 2025, 20:08
Dritare.net
Në një dëgjesë publike me banorët e njësive administrative 8 dhe 9, përfaqësues të lartë të qeverisë dhe Bashkisë Tiranë prezantuan projektbuxhetin ambicioz për vitin 2026 dhe vizionin afatmesëm deri në vitin 2030. Takimi, i drejtuar nga deputetja Ogerta Manastirliu, vuri në fokus një sërë reformash madhore ekonomike dhe sociale, si dhe investime konkrete infrastrukturore që synojnë përmirësimin rrënjësor të cilësisë së jetës në kryeqytet.
Ministrja Delina Ibrahimaj shpalosi një nga nismat më të rëndësishme të buxhetit, një reformë gjithëpërfshirëse të pensioneve. Duke nisur nga janari 2026, do të ketë një rritje progresive të pensioneve për të gjitha kategoritë, me objektivin që deri në vitin 2030, pensioni urban i plotë të arrijë 40,000 lekë, ai i pjesshëm 22,000 lekë, ndërsa pensioni rural dhe ai familjar 18,000 lekë.
Kjo rritje do të jetë shtesë dhe nuk do të prekë indeksimin vjetor sipas inflacionit. Gjithashtu, u konfirmua se bonusi i fundvitit për pensionistët do të vazhdojë të jepet edhe këtë vit. Një tjetër lajm i rëndësishëm ishte plani për rritjen e pagës minimale, e cila nga 1 janari do të bëhet 500 euro (rreth 50,000 lekë), me synimin për të arritur në 700 euro deri në vitin 2030. Për të mos rënduar bizneset, qeveria ka parashikuar subvencionimin e kostove shtesë të sigurimeve shoqërore që vijnë si pasojë e kësaj rritjeje.
Një vëmendje e veçantë iu kushtua familjeve të reja dhe fëmijëve. Deputetja Manastirliu prezantoi programin e ri "Shkolla pas Shkolle", i cili do të nisë si pilot në vitin 2026. Ky program do t'u ofrojë nxënësve të klasave 1-5 mundësinë të qëndrojnë në ambientet e shkollës edhe pas orarit mësimor, ku do të kenë një vakt ushqimor falas, ndihmë me detyrat dhe do të angazhohen në aktivitete kulturore, artistike e sportive. Ky program, një partneritet mes qeverisë dhe bashkisë, synon të lehtësojë prindërit dhe të ofrojë një mjedis të sigurt dhe zhvillues për fëmijët.
Nënkryetarja e Bashkisë, Vasilika Vjero, dhe nënkryetari Ilir Vango detajuan planet për investime në njësitë 8 dhe 9. Këto përfshijnë ndërtimin e rrugëve dytësore, rikualifikimin e territoreve urbane, rikonstruksionin e tregjeve, si dhe ndërtimin e kopshteve dhe çerdheve të reja për të përballuar kërkesat në rritje të komunitetit.
Një projekt strategjik është rehabilitimi i plotë i lumit Lana, i cili do të transformojë zonën duke eliminuar përmbytjet dhe duke krijuar korridore të reja transporti, përfshirë korsi për biçikleta dhe transportin publik. Gjithashtu, u fol për çlirimin e rreth 100,000 metrave katrorë hapësirë publike në të gjithë Tiranën, të cilat do të kthehen në kënde lojërash dhe zona çlodhëse për komunitetin.
Takimi u pasua nga një dialog i hapur me banorët, të cilët ngritën shqetësime konkrete si mungesa e ambulancave në disa zona, nevoja për më shumë çerdhe, asfaltimi i rrugicave të brendshme dhe vonesat në pagesën e bonusit të bebes. Përfaqësuesit e bashkisë dhe qeverisë u zotuan për adresimin e këtyre çështjeve, duke theksuar se buxheti është fleksibël dhe se kërkesat e komunitetit do të merren në konsideratë për të vendosur prioritetet e investimeve./dritare.net
