Sulm me thikë në shkollën gjermane. 18-vjeçari nga Kosova plagos mësuesen!
E Premte 5 Shtator 2025, 12:12
Dritare.net
Një ngjarje e rëndë ka tronditur sot qytetin e Essenit, ku një nxënës dyshohet se ka sulmuar me thikë një mësuese brenda ambienteve të një kolegji profesional (Berufskolleg) në lagjen Nordviertel. Ngjarja ndodhi rreth orës 9:30 të mëngjesit dhe shkaktoi panik në shkollë dhe në mbarë qytetin.
Detajet e ngjarjes
Sipas burimeve të gazetës gjermane BILD, autori është një 18-vjeçar me origjinë nga Kosova, i cili dyshohet se i është afruar mësueses dhe e ka goditur me thikë në zonën e barkut. Gruaja u transportua me urgjencë në një spital universitar, ku iu nënshtrua një ndërhyrjeje kirurgjikale. Zyrtarët konfirmojnë se ajo është jashtë rrezikut për jetën, por ndodhet në gjendje të rëndë.
Pas sulmit, autori është larguar nga vendi i ngjarjes. Sipas dëshmitarëve, ai është parë më vonë në një park afër Stacionit Qendror të Essenit, rreth tre kilometra nga shkolla. Forcat speciale të policisë (SEK) tentuan ta ndalonin, por ai dyshohet se u përball me efektivët duke iu afruar me thikë në dorë. Si pasojë, policia hapi zjarr ndaj tij, duke e plagosur rëndë. I riu është intubuar dhe ndodhet në gjendje kritike.
Masat e sigurisë dhe paniku në shkollë
Policia gjermane ka ndërmarrë një operacion të gjerë sigurie. Zona përreth shkollës është rrethuar me forca të shumta të armatosura dhe pajisje speciale. Një helikopter policor monitoroi nga ajri situatën, ndërsa qindra nxënës dhe staf mësimor u evakuuan nga ndërtesa. Disa prej nxënësve u barrikaduan në klasa, duke ndjekur protokollet standarde për situata emergjente.
Dhjetëra nxënës janë raportuar në gjendje shoku dhe kanë marrë ndihmë mjekësore nga ekipet e emergjencës. Sipas autoriteteve, shumë prej tyre ishin dëshmitarë të sulmit apo morën pjesë në dhënien e ndihmës së parë.
Reagime zyrtare
Kryebashkiaku i Essenit, Thomas Kufen (CDU), ka mbërritur në vendngjarje dhe është informuar drejtpërdrejt për zhvillimet. Në një deklaratë të shkurtër, ai shprehu shqetësimin për aktin e dhunës dhe falënderoi shërbimet e emergjencës për reagimin e shpejtë dhe profesional.
Policia ka kërkuar nga qytetarët që të shmangin zonën përreth shkollës dhe parkut ku u identifikua autori, për shkak të operacionit që ende po vijon.
Identiteti i autorit
Sipas mediave gjermane, autori i dyshuar është një 18-vjeçar kosovar, nxënës në të njëjtin kolegj ku ndodhi sulmi. Hetimet janë në vazhdim për të zbuluar motivet dhe rrethanat që çuan në këtë akt dhune./E.P-dritare.net
