Trump: Vendimi për sulmin ndaj Iranit shtyhet për disa ditë
E Martë 19 Maj 2026, 18:06
Dritare.net
Presidenti i Shteteve të Bashkuara të Amerikës, Donald Trump, ka vendosur një afat të kufizuar kohor për vendimin e tij mbi pezullimin e përkohshëm të sulmeve të planifikuara ndaj Iranit, ndërsa në rajon po vijojnë përpjekjet diplomatike për një marrëveshje të mundshme paqeje.
Në një postim në rrjetet sociale të hënën, Trump deklaroi se kishte vendosur të “shtyjë” planin për sulm ndaj Iranit të martën, pas kërkesave të bëra nga udhëheqësit e Katarit, Arabisë Saudite dhe Emirateve të Bashkuara Arabe, të cilët kanë kërkuar ulje tensionesh në rajon.
Më pas, të martën, ai sqaroi se kjo pauzë do të jetë vetëm për një periudhë të kufizuar kohore, duke lënë të hapur mundësinë e një vendimi të shpejtë.
“Po flas për dy ose tre ditë, ndoshta deri të premten, të shtunën, të dielën, ose në fillim të javës tjetër — një periudhë e kufizuar. Sepse nuk mund t’i lejojmë ata të kenë një armë të re bërthamore”, u shpreh Trump.
Deklaratat e tij vijnë në një moment tensionesh të larta mes Shteteve të Bashkuara dhe Iran, ndërsa përpjekjet diplomatike të ndërmjetësuara nga Katari, Arabia Saudite dhe Emiratet e Bashkuara Arabe po synojnë shmangien e përshkallëzimit të mëtejshëm ushtarak./K.C/dritare.net
