Trump shpall fundin e makthit në Izrael pas arritjes së armëpushimit me Hamasin
E Hënë 13 Tetor 2025, 16:04
Dritare.net
Jerusalem, 13 tetor 2025 – Presidenti amerikan Donald Trump është pritur me brohoritje në parlamentin izraelit, Knesset, ku deklaroi se “makthi i gjatë dhe i dhimbshëm më në fund ka marrë fund”, pas ndërmjetësimit të një armëpushimi historik mes Izraelit dhe Hamasit në Rripin e Gazës.
Në fjalimin e parë të një presidenti amerikan para Knessetit që prej vitit 2008, Trump tha se kjo ditë “do të shënojë momentin kur gjithçka fillon të ndryshojë – dhe shumë për më mirë – në Lindjen e Mesme”.
Armëpushimi erdhi pasi Hamas liroi 20 pengjet e fundit të mbetura në enklavën palestineze, ndërsa Izraeli pranoi të lirojë 250 të burgosur palestinezë dhe mbi 1 700 të ndaluar të tjerë gjatë dy viteve të fundit të luftimeve në Gaza.
Trump, i cili po zhvillon një turne të shpejtë diplomatik në rajon, pritet të marrë pjesë edhe në një samit paqeje në Sharm El-Sheikh, Egjipt, bashkë me presidentin egjiptian Abdel Fattah al-Sisi dhe liderë të tjerë botërorë.
“Agimi historik i një Lindjeje të Mesme të re”
Pas thirrjeve “Trump, Trump, Trump” nga deputetët izraelitë, presidenti amerikan tha se rajoni po përjeton “agimin historik të një Lindjeje të Mesme të re” – duke kujtuar marrëveshjet që Izraeli nënshkroi me disa shtete arabe gjatë mandatit të tij të parë.
“Më në fund, jo vetëm për izraelitët por edhe për palestinezët, makthi i gjatë dhe i dhimbshëm ka marrë fund,” deklaroi Trump.
Ai e përshkroi marrëveshjen si “përparimin më të vështirë nga të gjithë, ndoshta më të vështirin ndonjëherë”, duke shtuar se përfundimi i luftës mes Rusisë dhe Ukrainës do të jetë fokusi i tij i ardhshëm diplomatik.
Mbështetje e plotë nga Netanyahu
Trump u prezantua nga Kryeministri Benjamin Netanyahu, i cili e quajti “mikun më të madh që Izraeli ka pasur ndonjëherë në Shtëpinë e Bardhë”.
“Çdo gjë ndryshoi në qëndrimin amerikan ndaj fushatës sonë në Gaza që prej rizgjedhjes së Presidentit Trump,” tha Netanyahu, duke e falënderuar për “ndihmën e palodhur” në sigurimin e kthimit të pengjeve të mbetura.
Trump, nga ana e tij, i ktheu komplimentet: “Nuk është njeriu më i lehtë për t’u trajtuar, por pikërisht kjo e bën të madh.”
Armëpushimi dhe plani i paqes
Armëpushimi, që hyri në fuqi të premten në mëngjes, është faza e parë e planit 20-pikësh të paqes së Trump, i cili pritet të zbatohet me hapa të tjerë negociues në javët në vijim.
Presidenti amerikan tha se armëpushimi “do të qëndrojë”, duke paralajmëruar krijimin e një “Bordi të Paqes” që ai do ta drejtojë për administrimin e territorit të Gazës. Netanyahu konfirmoi në fjalën e tij se “është i përkushtuar ndaj kësaj paqeje”.
“Presidenti i Paqes”
Në sallë ishin të pranishëm edhe sekretari amerikan i shtetit Marco Rubio, sekretari i mbrojtjes Pete Hegseth, si dhe këshilltarët e afërt Steve Witkoff dhe Jared Kushner, të cilët u duartrokitën fuqishëm për rolin e tyre në ndërmjetësimin e marrëveshjes. Kushner shoqërohej nga bashkëshortja e tij, Ivanka Trump.
Disa nga deputetët mbanin kapele të kuqe me mbishkrimin “Trump the Peace President” (“Trump, Presidenti i Paqes”).
Kryetari i parlamentit izraelit e cilësoi Trumpin si “njeriun më të merituar për Çmimin Nobel të Paqes të vitit të ardhshëm”.
Megjithatë, disa deputetë izraelitë që kërkojnë vazhdimin e luftës në Gaza bojkotuam seancën./L.F-dritare.met
