Trump: Sulmet amerikane e kthyen programin bërthamor të Iranit dekada pas
E Mërkurë 25 Qershor 2025, 11:11
Dritare.net
Pas përfundimit të konferencës për shtyp, presidenti amerikan Donald Trump ka riafirmuar pretendimin e tij se sulmet ushtarake amerikane ndaj objekteve bërthamore të Iranit kanë shkaktuar "shkatërrim total", duke e kthyer programin bërthamor iranian "dekada pas". Kjo deklaratë vjen pavarësisht një raporti të rrjedhur nga inteligjenca amerikane që hedh dyshime mbi efektshmërinë e goditjeve.
I pyetur drejtpërdrejt mbi raportin, Trump u shpreh:
“Ata vërtet nuk e dinë. Ajo që di unë është që këto goditje ishin një shkatërrim total i objekteve bërthamore të Iranit.”
Reagime nga zyrtarët amerikanë
Sekretari amerikan i Mbrojtjes, Pete Hegseth, e përshkroi misionin si “i përkryer”, ndërsa minimizoi rëndësinë e raportit të inteligjencës, duke e cilësuar atë si “paraprak dhe me motive politike”.
Në të njëjtën linjë u shpreh edhe Sekretari i Shtetit, Marco Rubio, i cili tha:
“Ky raport është pjesë e lojërave që këta njerëz luajnë. Faktet janë të tjera.”
NATO mbështet Amerikën
Sekretari i Përgjithshëm i NATO-s, Mark Rutte, e vlerësoi ndërhyrjen amerikane, duke e quajtur një operacion “mbresëlënës”, që sipas tij “neutralizoi kapacitetin bërthamor të Iranit.” Rutte theksoi gjithashtu se aleanca do të vazhdojë të mbështesë çdo përpjekje për të frenuar përhapjen e armëve të shkatërrimit në masë./L.F-dritare.net
