Në një intervistë për Shqip nga Dritan Hila në DritareTV, ish-deputeti i PS-së Arben Çuko komentoi deklaratat e Gazment Bardhit pas humbjes së Partisë Demokratike në qarkun e Fierit, duke e cilësuar atë si një përpjekje për të justifikuar një disfatë historike.
“Politikisht Bardhit i takon të justifikojë humbjen poshtëruese që pësoi. Kjo humbje, në mos gaboj, është për herë të fundit që i ndodh PD-së në Fier që nga viti 2013. Për herë të fundit që ka pësuar humbje të tilla është në vitet ’90, atëherë kur kishte sistem mazhoritar. Këtë rekord e theu Bardhi, dhe kjo humbje duhet ta detyronte atë, si politikan, që të kërkonte përgjegjësi,” tha Çuko.
Ai shtoi se “të parët që nuk e besojnë deklaratën e Bardhit janë vetë demokratët e Fierit. Unë kam dëgjuar eksponentë të PD-së që thonë se me ardhjen e Bardhit humbi edhe besimi i anëtarësisë. Kjo ka qenë fushata më qytetare që ka ndodhur jo vetëm në Fier, por në gjithë Shqipërinë. Nuk pati as konflikte, as tensione. Pra, më shumë se Bardhi, populli është më i zgjuar sesa politikanët.”
Për sa i përket akuzave për manipulim dhe përfshirjen e policisë, Çuko u shpreh me skepticizëm:
“Bardhi foli për bandat që penguan votuesit, por nuk dha asnjë emër konkret. Pyetja ime është: Ku janë këto banda? Si mund të pengojnë 20,000 votues të mos dalin në votim? Kjo është thjesht një fantazi e pabazë.”
Më tej ai vijoi duke folur për organizimin e partive:
“Partia Socialiste është organizuar në mënyrë unike, si një organizëm i integruar. Çdo qendër votimi është pjesë e një rrjeti që funksionon në mënyrë të koordinuar. Ndërkohë Partia Demokratike nuk ngriti zyra elektorale në shumicën e njësive administrative në Fier, me mijëra votues pa asnjë organizim në terren.”
Çuko nuk kurseu kritikat edhe për lidershipin aktual të PD-së:
“Demokratët masivisht kundërshtuan lidershipin aktual, nga Sali Berisha deri te Bardhi. Mungesa e besimit ndaj tyre është fakt. Nëse nuk ndryshohet gjithë zinxhiri komandues, PD nuk do të dalë nga kjo situatë.”
Ai përfundoi duke theksuar:
“Fushata elektorale kërkon tri gjëra themelore: organizim, frymë dhe lider. Në Fier, PS-ja i ka këto tri elemente, ndërsa PD jo. Pa këto, humbja ishte e pashmangshme dhe mund të ishte edhe më e thellë.”/K.C/dritare.net
