Thethi që mahnit botën! Turistët e huaj flasin për përvojën magjike në Alpet Shqiptare
E Shtunë 16 Gusht 2025, 16:04
Dritare.net
Kryeministri Edi Rama ka ndarë një video nga Thethi, ku turistë nga vende të ndryshme të botës shprehin përshtypjet e tyre për këtë perlë të Alpeve Shqiptare. Në rrëfimet e tyre, vizitorët tregojnë se janë magjepsur nga bukuria e natyrës, mikpritja tradicionale, ushqimi vendas dhe eksperiencat unike që ofron zona, nga shëtitjet drejt Syrit të Kaltër deri tek adrenalina e Zip Line.
“Thethi, perla e Alpeve Shqiptare, po mirëpret vizitorë nga e gjithë bota me hapësirat e rikthyera publike në identitet e në harmoni me peizazhin, ku ata mahniten me pamjet përrallore, mikpritjen tradicionale, me ujin e kristaltë e me ajrin e pastër që të falin qetësi dhe energji pozitive,” – shkruan Kryeministri Edi Rama në një postim në rrjete sociale.
Përvoja e turistëve që kanë zgjedhur Thethin konfirmon këtë realitet. Nga Australia, Austria, Franca, Gjermania, Zelanda e Re, Skocia e shumë vende të tjera, vizitorët e përshkruajnë Thethin si një vend “magjik, mistik, një përqafim i ngrohtë” ku gjithkush dëshiron të kthehet.
“Shiko ku jam, po zgjohem në një ditë me diell, qiell blu, i rrethuar nga male në fshatin e vogël të Thethit. Si mund të mos jetë një ditë e mirë? Kam ardhur nga Australia dhe në Shqipëri kam tetë javë. Vetëm në Theth kam kaluar gati një muaj, sepse e dua shumë,” – thotë një turist australian.
Δείτε αυτή τη δημοσίευση στο Instagram.
Vizitorë nga Austria tregojnë se mbetën të befasuar nga qetësia dhe relaksimi që gjetën mes maleve, ndërsa turistë të tjerë veçojnë mikpritjen e vendasve, ecjet drejt Syrit të Kaltër, ushqimin tradicional dhe natyrën e paprekur.
“Është si një magji që të tërheq dhe nuk të lëshon. Nuk njoh askënd që ka ardhur këtu e nuk ka dashur të kthehet përsëri,” – shprehet një tjetër vizitor.
Nga Zelanda e Re, turistët krahasojnë peizazhin e Thethit me Dolomitet, ndërsa francezët e gjermanët e përshkruajnë si një destinacion të përkryer për alpinizëm, natyrë të mrekullueshme dhe mikpritje shqiptare.
“E zgjodhëm Thethin për shkak të shtegut ‘Majat e Ballkanit’. Ushqim i mirë, bujtina të ngrohta, qentë dhe mikpritja, gjithçka është perfekte,” – shprehen turistë nga Skocia.
Një tjetër atraksion që po tërheq vëmendjen e vizitorëve është edhe Zip Line, një eksperiencë unike që ofron adrenalinë dhe panoramë mahnitëse mbi luginë.
Nga kudo që vijnë, Australia, Austria, Franca, Gjermania, Zelanda e Re, Skocia, Izraeli apo SHBA-ja, turistët bien dakord në një pikë: Thethi është një destinacion që duhet parë dhe përjetuar të paktën një herë në jetë./K.C/dritare.net
