Aldo Shllaku, shqiptari pas filmave të Holliwood!
E Diel 19 Prill 2026, 12:12
Dritare.net
Kryeministri Edi Rama kishte sot të ftuar në podkastin Flasim, kompozitorin shqiptar me karrierë ndërkombëtare Aldo Shllaku, një prej emrave që sot përfaqësojnë suksesin shqiptar në industrinë e muzikës filmike në Hollywood.
Shllaku solli një rrugëtim jetësor që nis nga Elbasani, ku u rrit dhe u formua në një familje me histori të vështirë, të shënuar nga internimet dhe zhvendosjet, deri te skenat më të mëdha të kinemasë botërore. Ai kujtoi origjinën e familjes nga Shkodra, por edhe jetën në Elbasan, ku prindërit e tij u angazhuan në themelimin e teatrit lokal, ndërsa më vonë u përballën me pasojat e luftës së klasave, një periudhë që la gjurmë të thella në jetën familjare.
Në rrëfimin e tij, Shllaku tregoi se pas mbarimit të shkollës së mesme dhe studimeve në artet muzikore në Shqipëri, në vitet e trazicionit vendosi të largohej nga vendi së bashku me familjen, fillimisht drejt Greqisë dhe më pas drejt Kanadasë, ku nisi një etapë të re formimi profesional në kompozicion. Ai përshkroi edhe periudhën e studimeve dhe punës në Montreal, si dhe vendimin për t’u zhvendosur më pas në Los Anxheles, ku sot jeton prej më shumë se dy dekadash.
Një pjesë e rëndësishme e intervistës iu kushtua fillimeve të tij në industrinë e filmit, ku ai tregoi se pas përfundimit të studimeve u angazhua si asistent i një prej kompozitorëve të njohur të muzikës filmike, duke punuar në orkestrime, përgatitje muzikore dhe procese krijuese për filma dhe projekte të mëdha të Hollywood-it. Ky bashkëpunim, sipas tij, shërbeu si shkolla e vërtetë profesionale, ku ai mësoi praktikisht funksionimin e industrisë dhe disiplinën e saj.
Shllaku ndau gjithashtu detaje nga bashkëpunimet me emra të mëdhenj të kinemasë botërore, duke përmendur aktorë si Robert De Niro, Morgan Freeman dhe Tommy Lee Jones, si dhe përvojat në sheshxhirime ku, siç u shpreh ai, thjeshtësia dhe profesionalizmi mbizotëronin mbi çdo gjë tjetër. Ai veçoi se puna në film kërkon përshtatje të vazhdueshme me regjisorin dhe produksionin, ku muzika ndërtohet në funksion të skenës dhe narrativës.
Një pjesë e rëndësishme e bisedës u fokusua edhe tek evolucioni teknologjik në muzikën filmike. Shllaku foli për përdorimin e inteligjencës artificiale dhe programeve digjitale në procesin krijues, duke theksuar se teknologjia ka ndryshuar rrënjësisht mënyrën e punës, por pa zëvendësuar ende ndjeshmërinë njerëzore në kompozim. Sipas tij, pavarësisht avancimeve të shpejta, dallimi mes muzikës së krijuar nga njeriu dhe asaj të gjeneruar nga kompjuteri mbetet ende i ndjeshëm për veshin profesional.
Në intervistë u prek edhe jeta e tij familjare në SHBA, ku ai tregoi se është baba i tre vajzave dhe se përpiqet të ruajë gjuhën shqipe në familje, pavarësisht jetës në një mjedis ndërkombëtar. Ai foli edhe për mënyrën se si balancohet trashëgimia kulturore me realitetin amerikan, duke e konsideruar gjuhën dhe identitetin shqiptar si një vlerë që duhet ruajtur me kujdes.
Në fund të bisedës, Shllaku ndau edhe disa plane artistike, përfshirë koncerte dhe bashkëpunime ndërkombëtare, si dhe një rikthim simbolik në Shqipëri për projekte muzikore me Orkestrën e Teatrit të Operas dhe Baletit, duke përfshirë edhe qytete të tjera si Shkodra dhe Prishtina. Ai e mbylli rrëfimin si një dëshmi të qartë se rruga e diasporës, megjithëse e vështirë dhe e gjatë, mund të kthehet në një histori suksesi që lidh origjinën me skenat më të mëdha të botës./dritare.net
