A është hantavirusi një Covid i ri? Ja çfarë thotë OBSH!
E Shtunë 9 Maj 2026, 17:05
Dritare.net
Drejtori i Përgjithshëm i World Health Organization, Tedros Adhanom Ghebreyesus, ka siguruar banorët e Tenerife se rreziku i infektimit është i ulët përpara mbërritjes së anijes turistike MV Hondius, ku është shfaqur një shpërthim i hantavirusit.
Në një mesazh drejtuar qytetarëve, Tedros tha se “ky nuk është një tjetër Covid” dhe se aktualisht nuk ka pasagjerë me simptoma në bord.
Anija MV Hondius pritet të mbërrijë në portin e Granadilla gjatë orëve të para të së dielës. Deri tani janë konfirmuar gjashtë raste me hantavirus mes pasagjerëve, përfshirë një nga tre personat që humbën jetën gjatë udhëtimit nga Amerika e Jugut.
Sipas OBSH-së, virusi dyshohet të jetë kontraktuar gjatë vizitave në Argjentinë, Kili dhe Uruguai, ku pasagjerët kishin marrë pjesë në një tur vrojtimi zogjsh në zona ku jetojnë brejtës që mbartin virusin.
Autoritetet spanjolle kanë marrë masa të rrepta sigurie. Pasagjerët do të qëndrojnë në anije dhe do të largohen vetëm me mjete të vogla drejt aeroportit, ku do të nisen me fluturime riatdhesimi për në Britani, SHBA, Francë, Gjermani, Belgjikë dhe Irlandë.
Ministrja spanjolle e Shëndetësisë, Mónica García, tha se të gjithë pasagjerët dhe personeli që do të ketë kontakt me ta do të mbajnë maska FFP2.
Hantavirusi zakonisht transmetohet nga brejtësit, por varianti Andes mund të transmetohet edhe nga njeriu te njeriu. Simptomat përfshijnë temperaturë, lodhje të fortë, dhimbje muskujsh, të vjella, diarre dhe vështirësi në frymëmarrje./L.F-dritare.net
