Kancelari Merz vizitë të befasishme në Kiev mes shpërthimeve: Zelensky, mund të mbështeteni tek ne!
Sunday 4 October 2026, 10:10
Dritare.net
Kancelari gjerman Friedrich Merz ka mbërritur këtë të diel në Kiev për një vizitë të paparalajmëruar, në një moment kur Rusia ka intensifikuar sulmet ndaj kryeqytetit ukrainas. Kreu i qeverisë gjermane deklaroi se qëllimi i udhëtimit është t’i përcjellë presidentit Volodymyr Zelensky një mesazh të qartë: Ukraina mund të vazhdojë të mbështetet te Gjermania.
Merz mbërriti në Kiev me tren, i shoqëruar nga ministrja gjermane e Ekonomisë, Katherina Reiche, si dhe nga një delegacion me drejtues të kompanive gjermane të mbrojtjes dhe energjisë.
“Kam ardhur sot në Kiev sepse Ukraina ka nevojë për të gjithë mbështetjen tonë në javët e ardhshme. Nëse Rusia nuk ndalet, herët apo vonë makina e saj e luftës do të drejtohet kundër nesh. Sot do t’i them presidentit Zelensky: Mund të vazhdoni të mbështeteni në ndihmën tonë”, deklaroi Merz.
Vizita zhvillohet nën masa të forta sigurie dhe në një situatë të tensionuar në kryeqytetin ukrainas. Pak pas mbërritjes së kancelarit gjerman, sirenat e alarmit u dëgjuan në Kiev, ndërsa një dron rus goditi Urën Veriore mbi lumin Dnipro. Nga zona u pa tym pas shpërthimit, ndërsa autoritetet pezulluan qarkullimin në urë. Deri tani nuk ka të dhëna të menjëhershme për viktima nga ky sulm.
Vizita e Merz pritet të shoqërohet edhe me një paketë të re ndihme për Ukrainën. Sipas burimeve të qeverisë gjermane të cituara nga Reuters, Berlini pritet të zhbllokojë rreth 1 miliard euro ndihmë ushtarake dhe 350 milionë euro të tjera për riparimin e infrastrukturës energjetike të dëmtuar nga sulmet ruse.
Një nga çështjet kryesore të vizitës është forcimi i bashkëpunimit mes industrive të mbrojtjes të dy vendeve. Gjermania dhe Ukraina pritet të finalizojnë një marrëveshje për prodhimin e përbashkët të disa llojeve të dronëve, mes tyre edhe dronë interceptues që synojnë të neutralizojnë dronët e shpejtë rusë.
Merz pritet gjithashtu t’i premtojë Kievit furnizimin me mijëra dronë interceptues. Në diskutim është edhe zhvillimi dhe prodhimi i përbashkët i armëve me rreze të gjatë veprimi.
Kancelari gjerman paralajmëroi se mbështetja për Ukrainën lidhet drejtpërdrejt edhe me sigurinë e Gjermanisë dhe të Europës.
Vizita e tij vjen vetëm një ditë pasi Ministria e Jashtme ruse paralajmëroi shtetasit e huaj dhe personelin diplomatik kundër udhëtimeve dhe qëndrimit në Ukrainë, ndërsa Moska deklaroi se do të vazhdojë sulmet që i cilëson si hakmarrëse.
Lufta ajrore është intensifikuar gjatë javëve të fundit, me Rusinë që ka shtuar sulmet me raketa balistike dhe dronë ndaj qyteteve dhe infrastrukturës ukrainase, ndërsa Kievi ka vazhduar goditjet ndaj objekteve energjetike dhe rafinerive brenda territorit rus./dritare.net
