IGJEUM ngre alarmin: Rrezik i lartë për zjarre në pjesën më të madhe të vendit
Tuesday 4 August 2026, 20:08
Dritare.net
Instituti i Gjeoshkencave (IGJEUM) ka paralajmëruar se rreziku i zjarreve në Shqipëri do të mbetet i lartë gjatë ditës së mërkurë, si pasojë e temperaturave të larta dhe mungesës së reshjeve.
Sipas parashikimit, niveli i rrezikut do të jetë i lartë në qarqet Lezhë, Durrës, Tiranë, Elbasan, Fier, Berat, Korçë, Vlorë dhe Gjirokastër.
Ndërkohë, në qarqet Shkodër, Kukës dhe Dibër rreziku parashikohet të jetë i moderuar, megjithëse në disa zona të këtyre qarqeve ai mbetet i lartë, konkretisht në perëndim të Shkodrës, verilindje të Kukësit dhe perëndim të Dibrës.
IGJEUM bën të ditur se gjatë pasdites së sotme dhe ditës së nesërme nuk priten reshje shiu në të gjithë territorin e vendit. Temperaturat maksimale do të arrijnë deri në 37°C në zonat e ulëta, 34°C në bregdet dhe 33°C në zonat malore, duke krijuar kushte të favorshme për përhapjen e zjarreve.
Autoritetet u bëjnë thirrje qytetarëve të tregojnë kujdes maksimal, të shmangin ndezjen e zjarreve në ambiente të hapura dhe çdo veprim që mund të shkaktojë përhapjen e flakëve./L.F-dritare.net
