Fluks i të lënduarve në Spitalin e Traumës, Spahiu thirrje prindërve: Flisni me fëmijët
Monday 19 October 2026, 12:12
Dritare.net
Ministrja e Shëndetësisë dhe Mirëqenies Sociale, Klodiana Spahiu, ka reaguar pas fluksit të shtuar të të lënduarve që prej disa ditësh po përballon Spitali Universitar i Traumës. Në një mesazh nga spitali, Spahiu falënderoi stafet mjekësore për përkushtimin, ndërsa u bëri thirrje prindërve dhe profesionistëve të flasin me fëmijët dhe të rinjtë. Ajo paralajmëroi gjithashtu për përhapjen e lajmeve të rreme dhe të pamjeve të manipuluara, duke ftuar qytetarët t’u referohen burimeve zyrtare.
Mesazhi i plotë:
"Prej disa ditësh, Spitali Universitar i Traumës po përballon një fluks të shtuar të të lënduarve. Në këto momente të vështira, dua të falënderoj nga zemra ekipet e Qendrës Kombëtare të Urgjencës, stafet shëndetësore në të gjithë vendin, për përkushtimin, profesionalizmin dhe gatishmërinë e tyre, pa ndërprerje, për t’i ardhur në ndihmë çdo personi që ka pasur nevojë për kujdes.
U bëj thirrje prindërve, kujdestarëve, punonjësve socialë dhe të gjithë profesionistëve që të flasin me fëmijët dhe të rinjtë, t’i dëgjojnë dhe të kuptojnë shqetësimet e tyre. Fëmijët kanë të drejtë të shprehin mendimin e tyre, por kanë nevojë edhe për praninë, kujdesin dhe mbrojtjen tonë.
Asnjë nuk duhet të mbetet i pambrojtur në situata që rrezikojnë sigurinë e tij. Shërbimet sociale dhe psikologët janë të angazhuar për të mbështetur të miturit që kanë nevojë për ndihmë. Por përgjegjësia për t’i mbrojtur është e përbashkët.
Një shqetësim tjetër është përhapja e lajmeve të rreme dhe e pamjeve të manipuluara ose të nxjerra jashtë kontekstit. Ju ftoj të verifikoni informacionin përpara se ta shpërndani dhe t’u referoheni burimeve zyrtare. Në momente të tilla, informacioni i përgjegjshëm është thelbësor për të mos shtuar frikën dhe tensionin.
Dua t’i siguroj qytetarët se strukturat shëndetësore dhe sociale vijojnë detyrën e tyre, duke ofruar kujdes dhe mbështetje për këdo që ka nevojë.
E di që këto ditë janë të vështira. Por siguria e fëmijëve, shëndeti dhe jeta e çdo qytetari duhet të jenë mbi çdo ndarje dhe kundërshti.
Le t’i mbrojmë fëmijët nga rreziqet që mund të parandalojmë. Le të mos lejojmë që frika, zemërimi apo informacioni i pavërtetë të na largojnë nga përgjegjësia që kemi ndaj tyre.
T’i dëgjojmë. T’i kuptojmë. T’i mbrojmë.
Fëmijët janë të parët!"
