“Falë një shqiptari jam gjallë”/ Pasagjeri tregon si mbijetoi pasi u thye dritarja
Wednesday 22 July 2026, 11:11
Dritare.net
Njëmbëdhjetë ditë pas një incidenti të pazakontë në një fluturim të Ryanair nga Greqia drejt Gjermanisë, pasagjeri Ljubisa Karović ka rrëfyer momentet e tmerrit kur një dritare e avionit u thye dhe ai u tërhoq pjesërisht jashtë avionit gjatë fluturimit.
Karović, 61 vjeç, ishte ulur pranë dritares kur dëgjoi një shpërthim të fortë. Sipas dëshmisë së tij, presioni i kabinës humbi dhe ai u tërhoq nga dritarja, duke mbetur me kokën dhe krahun jashtë avionit. Pasagjerët e tjerë ndërhynë menjëherë dhe u përpoqën ta mbanin në vend, ndërsa njëri prej tyre përdori një valixhe për të bllokuar hapësirën e krijuar nga dritarja e thyer.
Bashkëshortja e tij, Svetlana, e cila ndodhej disa rreshta më pas, tha se pasagjerët u përpoqën me dëshpërim ta ndihmonin. Ajo shprehu mirënjohjen e saj të veçantë për një pasagjer, të cilin beson se ishte shqiptar, që ndihmoi në tërheqjen e bashkëshortit të saj dhe në bllokimin e dritares.
Karović tha se kujton kryesisht zhurmën e shpërthimit dhe ka ende dhimbje fizike dhe pasoja psikologjike nga ngjarja. Ai ka marrë dëmtime në krah, qafë dhe pjesë të tjera të trupit dhe mjekët i kanë kërkuar të mbajë një mbajtëse për qafën për të paktën gjashtë javë.
Ryanair ka deklaruar se ekuipazhi i kabinës ka vepruar në mënyrë profesionale gjatë emergjencës dhe se, pasi avioni zbriti në një lartësi të sigurt, pasagjerit iu dha ndihma e nevojshme. Kompania gjithashtu tha se në bord u thirr një mjek dhe se ndihma mjekësore priste pasagjerët në momentin e uljes në Selanik.
Avokati i Karović ka kundërshtuar versionin e kompanisë, duke pretenduar se pasagjerët ishin ata që ndërhynë menjëherë për ta ndihmuar.
Shkaku i saktë i thyerjes së dritares dhe incidentit mbetet nën hetim. Karović, i cili thotë se ka fluturuar shpesh gjatë jetës së tij, pranon se tani e ka të vështirë të mendojë për një tjetër udhëtim me avion.
Mesazhi i tij pas përvojës së rëndë është i qartë: pasagjerët duhet të mbajnë gjithmonë rripin e sigurimit gjatë fluturimit.
