U plagos në sulmin e Mynihut, 13 vjeçari kosovar zgjohet nga koma
E Enjte 11 Gusht 2016, 09:09
Dritare.net
Beneti është një ndër viktimat e sulmit të kryer muajin e kaluar në Munih, si pasojë e të cilit kanë humbur jetën 9 persona. 13 vjeçari shqiptar nga Kosova Lindore ka pësuar një lëndim të rëndë në nofull por ka mbijetuar, transmeton albinfo.ch.
Ai ishte qëlluar në McDonalds të qendrës tregtare Olympia së bashku me tre shokë të tij, kur atentatori 18 vjeçar gjermano-iranian hapi zjarr. Ali David Sonboli kishte gjuajtur në mënyrë të qëllimtë edhe në drejtim të kokës së Benetit.
Kur pas katër ditëve, mjekët arritën ta kthejnë djaloshin nga koma, prindërit e tij dhe personeli i treguan se tre shokët që kishin qenë me të kishin vdekur në sulmin e bërë atë ditë.
«E gjithë familja vazhdon të jetë në gjendje shoku», thotë farmacistja Birgit Lauterbach, në farmacine e të cilës punon si shofer babai i Benetit, Fati A.
Benet A. ka edhe dy vëllezër në moshën 3 dhe 9 vjeçare.
Çifti i farmacistëve Birgit dhe Arndt Lauterbach ka iniciuar ndërkohë një aksion ndihmash për familjen shqiptare.
Është e vështirë të kuptohen përmasat e vuajtjes së Fatit dhe Gonxhes, thotë Birgit. «Ne duam të kontribuojmë që së paku familja të mos ketë edhe halle financiare», shton ajo.
Beneti është njëri ndër 35 personat e plagosur dhe të lënduar në atentatin e Munihut. Qyteti ka vendosur që të ndihmojë financiarisht familjet e viktimave dhe të të plagosurve dhe për këtë ka ngritur një fond, përcjell albinfo.ch.
Të mërkurën Asambleja e Komunës ka vendour njëzëri që në këtë fond të derdhen 500 mijë euro dhe që, në varësi nga nevojat, shuma e findit të rritet. Paratë do të shpenzohen, veç tjerash, edhe për trajtimin mjekësor të të plagosurve.
