Prostata/ Pse meshkujt mbi 50 vjeç nuk duhet të presin simptomat!
E Diel 7 Dhjetor 2025, 15:03
Dritare.net
Shëndeti urologjik është shpesh një temë e rrethuar nga hezitimi dhe tabutë, megjithatë ndikimi i tij në cilësinë e jetës është i jashtëzakonshëm. Në një analizë të detajuar për Dritare TV, mjekja Drilona Ndrevataj trajton çështje që prekin si meshkujt ashtu edhe femrat, duke filluar nga parandalimi i kancerit të prostatës, disfunksioni erektil, infertiliteti, e deri tek infeksionet e përsëritura urinare. Një nga mesazhet për meshkujt është rëndësia e kontrolleve periodike.
Pas moshës 50-vjeçare, vizita tek urologu nuk duhet të jetë opsionale, edhe në mungesë të simptomave.
Statistikat janë alarmante, kanceri i prostatës prek mbi 50% të popullatës mashkullore mbi këtë moshë. Rreziku qëndron në faktin se kjo sëmundje, ashtu si hipertensioni, është e heshtur. Në momentin që shfaqen shqetësimet, shpesh sëmundja ka avancuar përtej organit. Përveç kancerit, zmadhimi fiziologjik i prostatës (hiperplazia) prek rreth 70% të meshkujve, duke shkaktuar vështirësi në urinim dhe ndikuar drejtpërdrejt në jetën seksuale.
Një tjetër shqetësim madhor është disfunksioni erektil, i cili gabimisht mendohet se prek vetëm të moshuarit. Mjekësia moderne bën një ndarje të qartë, tek të rinjtë (20-40 vjeç), shkaku kryesor është psikologjik (ankthi i performancës), ndërsa mbi 50 vjeç, shkaqet janë shpesh organike, të lidhura me diabetin, hipertensionin apo obezitetin.
Për më tepër, stili i jetesës luan një rol kyç edhe në fertilitet.
Alkooli, duhani dhe substancat narkotike dëmtojnë rëndë cilësinë e spermës. Një zgjidhje kirurgjikale, si operimi i varikoçelit, ka treguar se përmirëson ndjeshëm parametrat e fertilitetit tek meshkujt e rinj. Përsa i përket shëndetit të femrave, infeksionet e fshikëzës së urinës (çistitet) janë ndër problemet më të shpeshta, duke prekur deri në 90% të grave të paktën një herë në jetë. Kur këto bëhen të përsëritura (rikorrente), çelësi nuk është vetëm antibiotiku, por ndryshimi i stilit të jetesës, përmirësimi i dietës dhe funksionimi i mirë i zorrës së trashë.
Hidratimi i duhur (1.5 - 2 litra ujë në ditë) mbetet këshillë thelbësore.
Në fund, mjekja thekson se urinimi pas aktit seksual është vërtet i dobishëm për të parandaluar infeksionet, dhe një jetë seksuale aktive (2-3 herë në javë) ndihmon në shëndetin e prostatës. Mesazhi përmbyllës: mos lejoni që turpi apo frika të bëhen pengesë. Diagnoza e hershme shpëton jetë dhe përmirëson cilësinë e saj në mënyrë drastike./dritare.net
