Rama për Financial Times: Qeveria jonë nuk pranon më një marrëveshje të dytë për emigrantët!
E Hënë 27 Maj 2024, 11:11
Dritare.net
Marrëveshja Shqipëri-Itali për emigrantët është e veçantë dhe nuk përsëritet me vendet e tjera, pavarësisht interesit, kështu është shprehur Edi Rama për Financial Times. Roma dhe Tirana ranë dakord vitin e kaluar për të ngritur qendra në Shqipëri, ku do të regjistroheshin mijëra emigrantë deri sa të miratohen kërkesat e tyre për azil.
Kjo marrëveshje u kritikua nga grupet e të drejtave, por gjithashtu ngjalli interes nga disa qeveri evropiane të qendrës së djathtë. Partia Popullore Evropiane e qendrës së djathtë madje e bëri atë pjesë të platformës së saj zgjedhore për zgjedhjet e qershorit për Parlamentin Evropian.
“Është një herë, 100 përqind një herë”, tha Rama. Ai thekson se qeveritë e tjera kanë ngjallur interes për të përsëritur marrëveshjen por kryeministri ka refuzuar.
"Unë thash jo. Sepse nuk ka kuptim për mua. Italia është shumë e veçantë për ne, më shumë se një marrëdhënie strategjike. Është një miqësi e rrënjosur thellë”, shprehet kryeministri.
Rama tha se marrëveshja me Italinë bazohej në një histori të gjatë zbatimi të ndërsjellë të ligjit, roja bregdetare italiane që ndihmoi Shqipërinë të kontrollonte emigracionin në vitet 1990 dhe përpjekjet më të fundit të përbashkëta kundër kontrabandës së drogës. Kritikët argumentojnë se plani ka probleme ligjore dhe kosto të larta. Partnerët perëndimorë janë përpjekur të marrin ndihmën e Shqipërisë për emigrantët, që kur ajo mirëpriti mijëra afganë të mbetur të ekspozuar ndaj talebanëve, pas tërheqjes së fuqive perëndimore në vitin 2020.
Lista filloi me kryeministrin e Mbretërisë së Bashkuar.
“Boris Johnson më telefonoi dhe më tha, lavdëroj udhëheqjen tuaj, le të bëjmë diçka së bashku. Le të kemi një marrëveshje që Britania të sjellë në Shqipëri emigrantët e paligjshëm për t'i mbajtur atje. Unë thashë, më falni, kjo nuk është e mundur”, kujton Rama.
Ndryshe nga marrëveshja italiane, e cila është për strehimin deri në 3,000 njerëz në të njëjtën kohë, oferta e Mbretërisë së Bashkuar nuk ishte një numër fiks.
“Ishte për të gjithë ata që vijnë në Britania si një tranzit. Thashë nuk ka mundësi. Pastaj, kishim të tjera që nuk do t'i përmend. Ndër vendet më të pasura në Evropë. Kjo çështje nuk mund të trajtohet duke e transferuar problemin”, shprehet Rama.
Përveç Shqipërisë, edhe vendet e tjera të Ballkanit mund të ndihmojnë nëse procesi do të ruhej brenda ligjit ndërkombëtar. Por Evropa e ktheu atë në një çështje ideologjike, elektorale dhe harroi se do t'i duheshin njerëz për të shmangur një "dimër demografik" dhe një rënie ekonomike si pasojë, thekson Rama. Më shumë se një milion shqiptarë kanë emigruar në BE dhe MB gjatë viteve, një e treta e popullsisë totale të vendit. Planet e reja të propozuara të BE-së për të përfshirë vendet e Ballkanit Perëndimor në rrugë praktike bashkëpunimi, të tilla si transfertat e lehta të parave ose burokracia e reduktuar e tregtisë ndërkufitare, do të kishte qenë e pamundur të imagjinohej pesë vjet më parë, kujton Rama.
“Nuk ka të bëjë me paratë. Ka të bëjë me hapjen e shtigjeve për t'u integruar dhe për të pasur të njëjtat kushte si anëtarët, duke mos qenë ende anëtar. Evropa është ballkanizuar. Ne ende e shikojmë Evropën si një vend ku do të mbrohemi nga shpërthimet e nacionalizmit që na çojnë në konflikte dhe luftëra. Por lëvizjet nacionaliste në Evropë jo vetëm që kanë gjetur një hapësirë në politikë, por kanë infektuar ose prekur lëvizjet e tjera”, shprehet Rama./M.K-dritare.net
