Vala e të nxehtit "përvëlon" Tiranën. Qytetarët dhe turistët gjejnë shpëtim në hije, mes zhegut përvëlues
E Hënë 30 Qershor 2025, 15:03
Dritare.net
Europa po përjeton një ndër valët më të forta të të nxehtit për këtë vit, me temperatura që tejkalojnë normat sezonale në shumë vende. Shqipëria, si pjesë e rajonit mesdhetar, nuk ka mbetur jashtë kësaj vale zjarri. Termometri në Tiranë ka shënuar mbi 39°C, duke kthyer qytetin në një "furrë".
Në rrugët e kryeqytetit, veçanërisht në sheshet dhe zonat qendrore, qytetarët dhe turistët përpiqen të përballojnë vapën e madhe. Burimet e ujit, hijet e pakta që ofrojnë pemët dhe kafet me ajër të kondicionuar janë kthyer në pika shpëtimi. Disa shfrytëzojnë instalacionet e lagështisë nëpër sheshe, të tjerë mbushin shishet në çezmat publike.
Pamjet e sjella nga agjencitë fotografike, si LSA, pasqyrojnë qartë përditshmërinë e ndezur të qytetit – fëmijë që luajnë në ujë, turistë me kapele e freskuese dore, qytetarë që fshijnë djersët nën hije.
Autoritetet kanë bërë thirrje për kujdes ndaj të moshuarve dhe fëmijëve, ndërsa spitalet raportojnë një rritje të rasteve me goditje nga i nxehti dhe dehidratim. Po ashtu, shërbimet zjarrfikëse ndodhen në gadishmëri të shtuar për shkak të rrezikut të lartë për zjarre në pyje dhe zona periferike.
Meteorologët parashikojnë që vala e të nxehtit do të vijojë edhe për ditët në vijim, duke e bërë korrikun një nga muajt më të nxehtë të regjistruar ndonjëherë në dekadën e fundit në vend./L.-dritare.net
