Rama sot në Maliq: Më 11 maj marrim shumicë vote, i themi BE-së do ulemi në sofër!
E Shtunë 19 Prill 2025, 12:12
Dritare.net
Kryeministri Edi Rama zhvilloi sot një takim me qytetarë në Maliq. Rama u kërkoi votën banorëve të Maliqit, ndërsa tha se 11 maji është një moment historik për Shqipërinë.
“E kemi bërë si zakon që takimin e parë në çdo vrap drejt finisht ta bëjmë në Maliq për të marrë energjinë e madhe pozitive që ka në këtë stacion dhe në këtë bastion të palëkundur të PS. Sot unë kam ardhur këtu për të folur për një punë shumë të madhe, shumë të veçantë, që një individ dhe populli i bie rrallë herë që t’i kryejë dhe kjo është puna e madhe e 11 majit që përtej tifozllikut partiak, na duhet të bashkohemi të gjithë si shqiptarë dhe duke u bashkuar t’i japim një mbështetje shumë të fuqishme negociatave me Bashkimin Europian. Na duhet të bashkohemi të gjithë si shqiptarë dhe t’i japim një mesazh shumë të qartë të gjithë vendeve të Europës, duke nxjerrë nga kutitë e votimit një shumicë popullore që i thotë Europës, duam të ulemi tani në sofrën e përbashkët të BE. Ka edhe dy vite kohë, kini parasysh që negociatat zhvillohen mes dy palësh, janë rreth 1 mijë vetë nga ana jonë, 1 mijë vetë nga ana e tyre që merren me negociatat për të kuptuar se çfarë lloj volumi pune është.
Kjo është një zgjedhje midis interesit të mbarë një populli, dhe hallit të një njeriu të vetëm. Zgjedhja është kundër së mirës së madhe të përbashkët të gjithë këtij kombi dhe interesit të një familje të vetme. Zgjedhja është midis Shqipërisë 2030, në Bashkimin Europian, zonjë në Europë, dhe kënetës dhe bufit të saj për ta kthyer Shqipërinë atje ku ajo përfundon kur është në ato duar",-tha Rama./K.C/dritare.net
