Nëntë të vrarë dhe mbi 25 të plagosur nga të shtënat në një shkollë në Kanada
E Mërkurë 11 Shkurt 2026, 08:08
Dritare.net
Nëntë persona kanë humbur jetën dhe të paktën 25 të tjerë janë plagosur si pasojë e të shtënave me armë zjarri në një shkollë dhe një banesë në provincën British Columbia, në perëndim të Kanadasë, kanë bërë të ditur autoritetet.
Sipas policisë, gjashtë viktima u gjetën të vdekura brenda ambienteve të Tumbler Ridge Secondary School, ndërsa një person i shtatë ndërroi jetë gjatë rrugës për në spital. Trupi i të dyshuarit u gjet gjithashtu në shkollë, sipas zyrtarëve.
Dy viktima të tjera u gjetën të pajeta brenda një banese pranë shkollës.
Autoritetet thanë se e njohin identitetin e autorit të dyshuar, por nuk kanë bërë publik emrin dhe gjininë e tij/saj.
Kryeministri i Kanadasë, Mark Carney, u shpreh i “shkatërruar” nga ajo që e quajti “të shtëna të tmerrshme”, ndërsa kryeministri i British Columbia, David Eby, tha se reagimi i shpejtë i policisë bëri që “tragjedia të mos ishte edhe më e rëndë”.
Një nxënës i shkollës Tumbler Ridge Secondary School deklaroi për CBC se gjatë sulmit ai dhe shokët e klasës “vendosën tavolina dhe bllokuan dyert” për t’u mbrojtur.
Tumbler Ridge është një qytet i vogël me rreth 2,400 banorë, i vendosur rreth 750 milje (1,200 kilometra) në veri të Vancouverit, qyteti më i madh në British Columbia. Autoritetet kanë nisur hetimet për të zbardhur rrethanat dhe motivet e kësaj ngjarjeje tragjike./L.F-dritare.net
