Ministri i Bujqësisë Andis Salla: SHBB-të do të transformojnë bujqësinë shqiptare
E Hënë 25 Maj 2026, 14:02
Dritare.net
Ministri i Bujqësisë dhe Zhvillimit Rural, Andis Salla, ka prezantuar një nga drejtimet kryesore të politikave të reja për zhvillimin e sektorit bujqësor në Shqipëri, duke vënë theksin te krijimi dhe zgjerimi i Shoqërive të Bashkëpunimit Bujqësor (SHBB). Sipas tij, ky model po shndërrohet në një instrument të rëndësishëm për zhvillimin e qëndrueshëm të fermerëve dhe për forcimin e konkurrueshmërisë së prodhimit shqiptar në tregjet vendase dhe ndërkombëtare.
Gjatë fjalës së tij, ministri theksoi se bujqësia shqiptare po hyn në një fazë të re organizimi, ku fermerët nuk do të operojnë më vetëm individualisht, por do të bashkëpunojnë në forma të organizuara, duke krijuar mundësi më të mëdha zhvillimi dhe përfitimi ekonomik.
“Ky është një potencial që po kthehet në zhvillim të qëndrueshëm për fermerët, të cilët po organizohen, po bashkëpunojnë dhe po hyjnë në një treg më të fortë”, u shpreh ministri.
Ai nënvizoi se Ministria e Bujqësisë nuk po e zhvillon këtë proces vetëm me fermerët, por edhe me bashkitë në të gjithë vendin, duke shfrytëzuar potencialin që secila zonë ka në sektorin bujqësor. Sipas tij, përfshirja e pushtetit vendor është thelbësore për të ndërtuar modele konkrete bashkëpunimi që i përshtaten nevojave të territorit.
Aktualisht, sipas të dhënave të paraqitura nga ministri, po punohet me 26 bashki të para, të cilat po shërbejnë si modele bashkëpunimi. Në këto bashki janë përfshirë rreth 334 fermerët e parë që janë organizuar përmes këtij sistemi.
Ndërkohë, paralelisht me këto iniciativa, janë krijuar edhe forma të tjera bashkëpunimi privat mes fermerëve. Në total, sipas ministrit, aktualisht në vend janë 84 modele bashkëpunimi bujqësor, ku përfshihen si modelet shtetërore të zhvilluara me bashkitë, ashtu edhe ato private.
Këto modele bashkëpunimi janë të shpërndara në zona të ndryshme të Shqipërisë dhe përfshijnë sektorë të ndryshëm të prodhimit bujqësor. Sipas ministrit, sektori i fruta-perimeve po zhvillohet në Dibër, Fier, Divjakë, Lezhë dhe Cërrik; sektori i ullirit dhe vajit të ullirit në Berat, Elbasan, Lushnjë dhe Vlorë; bimët medicinale dhe aromatike në Malësinë e Madhe dhe Belsh; qepa dhe farat në Shkodër; patatja në Kukës; drithërat në Durrës dhe arra në Kolonjë.
Ai bëri të ditur gjithashtu se procesi po zgjerohet edhe më tej, me modele të reja bashkëpunimi që janë në fazë krijimi në Shijak, Patos, Lezhë dhe Shkodër.
Ministri u ndal edhe te problematikat me të cilat përballen fermerët që operojnë individualisht. Sipas tij, prodhimi dhe tregtimi i vetëm shpesh sjell kosto më të larta, çmime më të ulëta për produktin, mungesë magazinimi dhe përpunimi, si dhe vështirësi për të hyrë në tregje më të mëdha.
Ai theksoi se aktualisht fermerët mund të përballen me humbje që arrijnë deri në 25% të prodhimit, si gjatë procesit të prodhimit ashtu edhe pas vjeljes së produkteve. Në këtë aspekt, modeli i bashkëpunimit synon të krijojë përfitime konkrete ekonomike.
Sipas tij, organizimi përmes SHBB-ve mund të sjellë një ulje të kostove nga 25 deri në 30%, ndërsa njëkohësisht krijon mundësi për fitime më të mëdha për fermerët.
Një pjesë e rëndësishme e fjalës së ministrit iu kushtua edhe rolit të Bashkimit Europian në zhvillimin e këtij modeli. Ai tha se format e bashkëpunimit janë ndërtuar mbi praktika dhe modele europiane që kanë rezultuar të suksesshme në vendet anëtare të BE-së.
Sipas tij, fermerët e organizuar në SHBB do të kenë akses më të madh në skemat kombëtare të mbështetjes, por edhe në fondet e Bashkimit Europian të dedikuara për sektorin e bujqësisë.
Ministri theksoi se në rastet kur fermerët aplikojnë individualisht, procedurat mund të jenë më të gjata dhe më komplekse, ndërsa përmes shoqërive të bashkëpunimit potenciali për mbështetje financiare është më i madh.
Ai deklaroi se për SHBB-të që krijojnë lidhje me skemat mbështetëse të Ministrisë, mbulimi financiar mund të arrijë deri në 100% të masës së financimit të parashikuar.
Gjithashtu, ministri e konsideroi forcimin e SHBB-ve si pjesë të rëndësishme të përgatitjes së sektorit bujqësor shqiptar për integrimin në Bashkimin Europian. Sipas tij, fermerët duhet të investojnë në magazinim, përpunim, paketim, certifikim dhe standardizim të produkteve, si dhe të ndërtojnë marrëdhënie të qëndrueshme me përpunuesit, tregtarët dhe eksportuesit.
Në përfundim të fjalës së tij, ministri Andis Salla u bëri thirrje fermerëve në të gjithë vendin që të bashkohen me këto modele bashkëpunimi dhe të aplikojnë për t’u bërë pjesë e skemave të mbështetjes.
“Synimi ynë është që këto modele të shtrihen në të gjitha bashkitë ku ka potencial prodhimi, përpunimi dhe tregtimi, duke ndërtuar një bujqësi më moderne, më konkurruese dhe më të përgatitur për tregun europian”, deklaroi ministri./L.F-dritare.net
