Kushtetuesja sërish pa vendim për “Ballukun”, shtyhet çështja
E Martë 3 Shkurt 2026, 15:03
Dritare.net
Gjykata Kushtetuese nuk ka arritur për herë të dytë të marrë një vendim për ankimin e Këshillit të Ministrave lidhur me çështjen e zëvendëskryeministres Belinda Balluku, duke shtyrë edhe një herë shqyrtimin e saj.
Mbledhja në dhomë këshillimi, e zhvilluar këtë të martë, nuk prodhoi një vendimmarrje përfundimtare, ndërsa trupa e gjyqtarëve kushtetues ka vendosur të marrë më shumë kohë për t’u shprehur mbi konfliktin e kompetencave mes Këshillit të Ministrave dhe Prokurorisë së Posaçme (SPAK).
Në qendër të këtij konflikti qëndron pyetja nëse një anëtar i qeverisë mund të pezullohet nga detyra gjatë një hetimi penal, një çështje me peshë të dyfishtë, juridike dhe politike. Vendimi i Gjykatës Kushtetuese pritet të ketë ndikim të drejtpërdrejtë në veprimtarinë e Kuvendit dhe të Këshillit të Mandateve dhe Rregullores.
Sipas afateve ligjore, Gjykata Kushtetuese ka 30 ditë për të dhënë një vendim përfundimtar, afat që përfundon më 22 shkurt.
Shtyrja e vendimit ka sjellë si pasojë edhe bllokimin e mbledhjes së Këshillit të Mandateve dhe Rregullores në Kuvend, i cili duhet të shqyrtojë kërkesën e SPAK për heqjen e imunitetit të Belinda Ballukut. Pa një vendim përfundimtar nga Gjykata Kushtetuese, mazhoranca socialiste nuk pritet të ndërmarrë hapa të mëtejshëm në këtë proces./L.F-dritare.net
