Në ciklin e emisioneve "Shqipëria prodhon", gazetarja Rudina Xhunga ishte këtë herë në Përmet për tiu njohur me glikotë e mrekullueshme. Donika dhe Zana përgatisin glikonë e shalqirit, mes traditës, aromës dhe kujtimeve.
"Pasi e zgjedhim shalqirin, e presim dhe e zgjedhim për gliko, e presim në pjesë. I heqim zemrën (pjesën e frutit), më pas dhe cipën".
Rudina Xhunga: Nuk bëhet me receta, nëse do të mësosh duhet të shikosh.
"Hiqet e gjithë pjesa e kuqe, që mos të zbutet në zierje, glikoja duhet të kërcasë në gojë.Pasi e kemi pastruar, e presim në copa, në forma të ndryshme sipas dëshirës.
Më pas marrim pak gëlqere, e hollojmë në ujë, gëlqerja e forcon frutin që do të bëhet gliko. Pasi i vëmë copat e shalqirit u hedhim ujin me gëlqere dhe i përziejmë here pas here. I lëmë aty dy orë. Pastaj i shpëlajmë dhe e ziejmë pak dhe e shpëlajmë sërish.
Masa e sheqerit varet nga masa e fetave të shalqirit. Nëse janë 20-25 feta duhet një kilogramë sheqer. Ditën e parë lihet gjysmë e zier, me qëllim që të lëshojë vetë lëng, e lëmë një ditë. Në ditën e dytë është zierja përfundimtare. Nënat e kuptojnë ndërsa marrin shurup në gisht dhe nëse shurupi ngjit, ai është gati, Në këtë kohë i hedhim limontozin dhe barbarosën për aromë"./M.M-dritare.net
