Dhurata Thanasi sjell recetën e arapashit, gjella e barinjve
E Enjte 17 Shtator 2020, 20:08
Dritare.net
Dhurata e Lugës së Argjendtë ka ndarë me ndjekësit e saj një recetë sa të shijshme, aq edhe të veçantë. Arapashi, ose gjella e barinjve siç quhet nga të gjithë.
Më poshtë receta e Lugës e Argjendtë!
"Arapashi (jo Harapashi) është një gatim shumë i lashtë i gatuar kryesisht nga barinjtë që kalonin një pjesë të mirë të jetës së tyre nëpër stane. Burimi kryesor i ushqimit të tyre ishte bulmeti. Edhe pse jetonin mes bagëtisë, barinjtë rrallëherë gatuanim mish, andaj gatime si dhalla, persheshi me kulaç dhe qumësht, kulaçi me gjalpë e mjaltë, arapashi, kukureci, kosi me mjaltë e bajame, përsheshi me kos dhe mjaltë, çaji i malit me mjaltë, shtalbi, salca e kaçupit, dhalla, hirra e qumështit, etj kanë lindur në kasollen e tij, nga ku ai dhe baresha kalonin kohën më të madhe të vitit. Arapashi gatuhej në shumë mënyra, kryesisht me lëngun dhe yndyrën që mbetej nga kecat e qengjat e pjekur në hell. Gjithë yndyra e mbledhur në tavën (teneqenë) që vihej poshtë qengjit kur piqej, mblidhej dhe përdorej si lëng bazë (i holluar me pak ujë të zjerë) dhe hirrën e mbetur nga ndarja e qumështit nga gjalpi, pasi ishin ndarë në dybek. Shpeshherë arapashit i shtoheshin ose zorrë holla të qengjave apo të brendëshmet e tyre ose dhjamërat e skuqura të quajtura cingaridhe. Mielli i misrit në përgjithësi skuqej në dhjamë ose gjalpë të freskët dhe zjarr të ngadaltë. Mëpas i shtohej lëngu i mishit i përzjerë me hirrën me gjalpë, ndonjë aromë rigoni apo sherebelë dhe lihej të zihej ngadalë derisa ti dilnin flluska sipër. Më pas shtoheshin cingaridhet e skuqura dhe sipas dëshirës dhe djathë i njomë. Eshtë një pjatë shumë kalorike por me një shije sublime."/K.C/dritare.net
