Djali i një shitësi qumështi u kthye në një yll që ndriçoi Hollywood-in!
E Martë 16 Shtator 2025, 17:05
Dritare.net
Hollywood-i humbi një nga yjet e tij më të ndritur. Robert Redford, aktori dhe regjisori legjendar, u nda nga jeta në moshën 89-vjeçare, duke lënë pas një trashëgimi të jashtëzakonshme në botën e kinemasë.
Por kush ishte në të vërtetë ky burrë që u kthye në ikonë të artit?
Nga fëmijëria e thjeshtë tek ëndrra e madhe
Charles Robert Redford lindi më 18 gusht 1936 në Santa Monica, Kaliforni. Djali i një shitësi qumështi dhe i një amvise, Redford u rrit në një familje modeste. Ai nuk pati një rrugë të lehtë, gjatë adoleshencës përballej shpesh me mungesë motivimi në shkollë dhe një periudhë të vështirë pas humbjes së nënës së tij.
Megjithatë, pasionet e tij për sportin, artin dhe udhëtimet e shtynë të kërkonte diçka më shumë nga jeta. Studioi pikturë në Paris dhe Vjenë, përpara se të kthehej në SHBA dhe të gjente veten në aktrim.
Ylli që magjepsi botën
Shumë shpejt, Redford fitoi famë në Broadway, e më pas pushtoi ekranin e madh. Film pas filmi, ai u bë një nga aktorët më të dashur të publikut dhe kritikës.
Veprat e tij më të paharrueshme janë tashmë pjesë e historisë së kinemasë:
Butch Cassidy and the Sundance Kid (1969) – filmi që e ngriti në yll absolut.
The Sting (1973) – që i dha çmimin Oscar për filmin më të mirë.
All the President’s Men (1976) – ku solli në ekran skandalin Watergate.
Out of Africa (1985) – një histori dashurie e pavdekshme me Meryl Streep.
Në vitin 1980, ai fitoi Oscar-in për regjisorin më të mirë me filmin Ordinary People.
Themeluesi i Sundance Festival
Përveç aktrimit, Redford do të mbahet mend edhe për vizionin e tij si themelues i Sundance Film Festival, që i dha zë mijëra regjisorëve të rinj dhe e bëri kinemanë indie pjesë të rëndësishme të industrisë.
Një jetë personale me dritë-hije
Redford ishte i martuar dy herë dhe u bë baba i katër fëmijëve, por përjetoi edhe humbje të mëdha, dy prej tyre ndërruan jetë para tij. Megjithatë, ai gjithmonë ruajti profilin e ulët dhe u përpoq të mos e përziente famën me jetën private.
Lamtumira e një legjende
Lajmi për ndarjen e tij nga jeta ka prekur miliona fansa dhe kolegë. Meryl Streep shkroi: “Një nga luanët iku. U prehsh në paqe, miku im i dashur.”
Robert Redford ishte më shumë se një aktor: ai ishte një vizionar, një njeri që doli nga thjeshtësia dhe arriti majat e artit botëror. Djali i një shitësi qumështi u kthye në një yll që ndriçoi Hollywood-in, dhe drita e tij do të mbetet e gjallë në çdo film, çdo kujtim, çdo festival./K.C/dritare.net
