Nuk është turp të kesh ndërtuar në socializëm, por të vjedhësh në demokraci!
E Hënë 27 Shkurt 2023, 18:06
Dritare.net
Në rubrikën Komenti i Ditës në Dritare TV gazetarja Rudina Xhunga tha se të gjithë ne jemi aksionerë të pasurisë kombëtare, ndonëse ajo po shfrytëzohet vetëm nga një grusht njerëzish. Zonja Xhunga tha se sot më shumë se kurrë është koha të flasim dhe të tregojmë për të gjithë ata që kanë kontribuuar në ndërtimin e pasurive kombëtare duke u bërë një ftesë gjithkujt që dëshiron, të tregojë për historinë e tyre apo prindërve, në Dritare TV. Duke u bërë bashkë ne shtohemi tha gazetarja Xhunga dhe duke u shtuar, frikësojmë ata që na vjedhin.
“Pas viteve 1990 shumëçka u shkatërrua, ndërmarrje të tëra. Është e qartë që industria shqiptare nuk degradoi, por ajo u shit për skrap sepse degradoi politika. Njerëz të caktuar u paguan që Shqipëria të humbiste gjithçka kishte dhe të kthehej në një vend siç është sot, në dorë të gjithkujt.
Por përveç shkatërrimit të pasurisë kombëtare, e cila është e dënueshme penalisht, ka ndodhur diçka tjetër po ashtu e dënueshme penalisht. Kontratat abuzive me ata që po shfrytëzojnë prej kohësh tashmë, pasuritë tona kombëtare. Për shembull njerëz që kanë punuar me naftën, të tregojnë se ajo që po ndodh tani me Bankers, është e padrejtë. Dhe kjo kuptohet kur sado pak përmendet nafta, Bankers në gazeta të veçanta sponsorizon shkrime ku thuhet drejtori aktual ka bërë dhurata të caktuara për një shkollë në një fshat.
Kjo duhet të jetë e qartë, që sapo të shikoni në një medie, që Bankers ka bërë këtë dhuratë, apo Kurum ka dhënë disa xhingla në një fshat tjetër, kini parasysh që media është paguar, me qëllim krijimin e një imazhi pozitiv për këto kompani. Të cilat në fakt përveçse fusin para në xhepat e tyre, nuk dihet se çfarë të mire i sjellin vendit.
Sot nuk mund të mendojmë vetëm për grilat e shtëpisë sonë, duhet të mendojmë edhe për oborrin. Në vendin tonë ka para, zot i të cilave je dhe ti, jemi të gjithë aksionerë në pasurinë kombëtare. Është kohë e artë tani, ndërsa kemi sytë te SPAK, të mendojmë për drejtësinë e cila funksionon që nga gjërat e vogla deri te të mëdhatë.
Ndaj unë mendoj që sot është momenti më shumë se kurrë të flitet, të tregohet, kush na e ka vjedhur pasurinë e prindërve tanë, pasurinë tonë, te vendit tonë. Ka ardhur koha të mendojmë më shumë për atë që na përket të gjithëve. Dhe këtë mund ta bëjmë duke folur. Shumë kush ka pasur indiferencë, por sot janë shtuar njerëzit që dëgjojnë, dhe ata që flasin.
Deri tani në emër te dekomunistizimit ka qenë e ndaluar të flitet për pasurinë kombëtare. Njerëzit kanë pasur turp e frikë, të pranojnë se prindërit e tyre kanë ndërtuar dhe kanë kontribuuar në pasurinë kombëtare.
Është e pafalshme që sot të punohet për një pagë 30 mijë lekë. Por nëse nuk flasim dhe të tregojmë se çfarë na kanë vjedhur, kush na e ka marrë, ata do të vazhdojnë të jenë heronjtë dhe ne skllevërit modernë. Por duke folur ne shtohemi dhe duke u shtuar, frikësojmë ata që na vjedhin. Ndaj je i ftuar të flasësh në Dritare TV.
Ji krenar për prindërit e tu që kanë ndërtuar në socializëm. Turpi është për ata që vodhën djersën e prindërve të tu, në demokraci”, u shpreh gazetarja Xhunga në Dritare TV./L.F-dritare.net
