
Një shpjegim për tifozët e Zhelenskit dhe armiqtë e Trump
Dritare.net
Nga Dritan Hila
Takimi i djeshëm në Shtëpinë e Bardhë do të mbetet në histori për shkak të një përplasjeje të hapur mes palëve, ku njëra anë vë në pah heroizmin e Zhelenskit dhe të tjerë atë të Trump-it.
Nuk dua të hyj në shpjegime psikologjike të atij takimi, pasi mund të ishte shmangur nga Trump duke mos e takuar fare, sikurse Zhelenski nuk mund t'i tregonte amerikanëve në shtëpinë e tyre se qenka oqeani që i mban larg rusëve që falë ukrainasve nuk e kanë kaluar, apo të tejkalonte në show të zotin e shtëpisë. Diskutimet emocionale rreth këtij takimi nuk janë synimi i këtij artikulli.
Cila është arsyeja që amerikanët këmbëngulin kaq shumë për pushimin e luftës dhe një paqeje me Rusinë?
E para është arsye taktike. Sado armë që t'i japin Ukrainës, ajo nuk mund ta fitojë luftën kundër fuqisë më të madhe bërthamore, e cila me gojën e Putinit ka deklaruar në vitin 2022 se një botë pa Rusinë nuk ka kuptim. Rusët janë në dijeni të planeve të ultrarepublikanëve për një shpërbërje të Federatës Ruse në 5 shtete, ndaj dhe Putin paralajmëroi se bashkë me Rusinë do zhduket edhe bota. Armatosja e një Ukraine thjesht do ta vonojë agoninë e saj, kurse Rusinë ta shtyjë në një kaos që tremb botën. Shpërbërja e një vendi me 5 mijë koka bërthamore dhe 190 etni, është një skenar apokaliptik që vetëm trutharët e ultrarepublikanëve dhe viktimat e propagandës së Zhelenskit si luftëtar i paepur nuk e mendojnë, sic nuk menduan aventurat në Afganistan dhe Irak. Por Rusia nuk është vendi ekzotik i luftëtarëve me shapka, por një vend i cili vetëm në 30 vjet ka bëra 22 luftëra dhe që ka një mendim që botën ruse e identifikon me planetin Tokë.
E dyta është strategjike. Rusia nuk është një kërcënim strategjik për SHBA-në. GDP-ja e saj është sa 1/15 e Kinës dhe ka një problem të madh demografik të plakjes së popullsisë.
Prej 30 vjetësh, aparatet amerikane kanë arritur në përfundimin se frenimi i Kinës ka dy rrugë, atë të kufizimit të teknologjjve të fundit, dhe të kufizimit të burimeve të lëndëve të para.
Kjo e dyta ka lidhje me Rusinë. Në 30 vite, amerikanët janë përpjekur t'i ndërpresin kinezëve burimet e afërta dhe kur ata shkojnë në Afrikë, t’u rrisin kostot.
Mirëpo lufta në Ukrainë po e shtyn Rusinë çdo ditë e më shumë në krahët e Kinës. Vendi me më shumë nga të gjitha lëndët e para në planet, rrezikon të bëhet furnitori kryesor dhe me çmim të lirë i konkurrentit strategjik të SHBA-së. Aktualisht Kina po i paguan hidrokarburet dhe mineralet ruse me çmim të reduktuar, në juan dhe me këste kur të dojë. Një ëndërr për Xi Jingping dhe një makth për aparatet amerikane. Dhe këtë aparatet amerikane nuk mund ta lejojnë. Është pikërisht ky presion që i vjen nga deep state Trump-it, që bën presion për një mbyllje të luftës dhe që kanë shkatuar këtë padurim ndaj sjelljes së ukrainasve. Sa i takon problemit të tokave të rralla, ai është shumë sekondar për amerikanët, madje nëse do u jepeshin atyre, do jetë në favor të ukrainasve, pasi që shoqëritë amerikane t'i shfrytëzojnë, duan krijimin e infrastrukturave dhe sigurinë ushtarake të investimit. Ç’ka do ta bënte ushtrinë amerikane të jepte garanci.
Në këto kushte, Trump është i detyruar të bëjë presion për mbylljen e luftës pasi çdo vonesë do ta shtyjë Rusinë më shumë në krahët e Kinës. Ndërtimi i një gazsjellësi të dytë, do ta bënte pastaj të pamundur shkëputjen e tyre nga krahët e njëra-tjetrës.
Administrata pararendëse, ndryshe nga narrativa që ka krijuar, ishte tërësisht pa bosht, reflektim ndoshta edhe i demencës së Biden. E tregoi këtë nga tërheqja kaotike në Afganistan, ku një marrëveshje e planifikuar me shkallëzim nga administrata Trump 1, përfundoi në braktisje tip Saigon nga Biden, dhe po ashtu një luftë e cila do të duhej të kishte përfunduar një muaj pas fillimit me marrëveshjen e Stambollit, u shty deri në limitet e saj. Ndaj Trump nxiton. Kurse Evropa është si ajo pula që i presin kokën, kurse Zhelenski nuk e ka kuptuar se shfaqja e tij ka mbaruar./dritare.net

















