Dështimi i kryerjes së ADN-së fut në ngërç procese gjyqësore ditë pas dite!
E Premte 31 Maj 2019, 21:09
Dritare.net
Një gjykatë belge ka urdhëruar ish-Mbretin e vendit që të paguajë 5000 euro në ditë gjobë deri sa të pranojë t’i nënshtrohet testit të ADN-së për të zgjidhur një çështje të hershme ligjore ku një grua pretendon se është vajza e tij.
Agjencia e lajmeve Reuters raporton se Mbreti Albert II, 84 vjeç, duhet të paguajë shumën e caktuar për çdo ditë që ka refuzuar të zbatojë urdhrin e Gjykatës, dhënë vitin e kaluar, duke bërë që artistja Delphine Boel, 50 vjeç, e cila pretendon se është vajza e tij, të përfitojë kështu një shumë të majme.
Avokati i Mbretit, Guy Hiernaux, ka deklaruar për mediat se Alberti nuk kishte arsye pse të mos e bënte testin. Nëse ai rezulton vërtet të jetë babai, zonja Boel do të marrë emrin Delphine Van België dhe me dekret mbretëror mund të përfitojë edhe titullin e Princeshës.
Alberti, i cili abdikoi nga froni gjashtë vjet më parë duke ia lënë atë djalit të tij Philippe, nuk e pranon pretendimin e Boel dhe prej një dekade palët janë përplasur në Gjykatë. Deri tani është vërtetuar përmes testit të ADN-së, se zonja Boel nuk është e bija e babait të saj ligjor, Jacques Boel, trashëgimtar i një prej dinastive më të pasura industrialiste të Belgjikës.
Identiteti i saj u bë pjesë e debatit publik pas botimit të biografisë së Mbretëreshës Paola, gruas italiane të Mbretit Albert, në vitin 1999, ku ajo pranonte si bashkëshorti kishte një lidhje të gjatë jashtë martesore prej së cilës kishte lindur edhe një vajzë në vitet 1960.
Alberti, i cili momentalisht nuk kryen asnjë detyrë publike, ka pranuar se martesa e tij kishte vështirësi. Të tre fëmijët e tij me Mbretëreshën Paola janë më të mëdhenj në moshë se Boel.
Një qasje e admirueshme dhe vullnetmirë ndaj të vërtetës në këtë rast nga ana e gjykatës e jo vetëm, ndërsa përdorimi i mënyrave efikase në favor të të drejtave të grave kryesisht, rezulton deçiziv në zgjidhjen e jo veç këtij rasti.
Për fat të keq në gjykatat shqiptare dështojnë ditë pas dite procese të tilla, pasi "baballarët" këtu, refuzojnë të kryejnë testin e ADN-së, duke iu shmangur përgjegjësive e duke penalizuar fëmijët e tyre, të cilët përpos mungesës së atësisë nuk përfitojnë paskësaj as pension ushqimor për këtë shkak.
Penalitetet si në këtë rast (të vendosura në ligj), do të mundësonin padyshim që procese të tilla të mos dështonin e fëmijët (nënat e tyre gjithashtu), të mund të fitonin të drejtat sipas ligjit./Dritare.net
