Donald Trump ka deklaruar se Irani ka një mundësi të fundit për të arritur paqe, ndërsa SHBA-ja po përpiqet të shohë nëse mund të arrihet një marrëveshje më e gjerë.
Duke folur nga Memphis, Tennessee, ku pritet të mbajë një fjalim për luftën kundër krimit, Trump dha një përditësim të shkurtër mbi situatën në Iran. Ai tha se negociatat me Teheranin kanë zgjatur prej kohësh, por këtë herë, sipas tij, “janë serioze”.
Trump shtoi se beson që Irani ka rënë dakord të mos zhvillojë armë bërthamore. Ai përsëriti gjithashtu pretendimin se një pjesë e konsiderueshme e udhëheqjes iraniane është vrarë që nga fillimi i konfliktit.
Megjithatë, ai nuk dha detaje se me kë po zhvillohen negociatat, duke theksuar vetëm se Irani ka “edhe një shans të fundit” për paqe.
“Shpresojmë që ta shfrytëzojnë,” tha ai. “Në çdo rast, Amerika dhe e gjithë bota do të jenë më të sigurta dhe planeti do të jetë më i sigurt.”
Nga ana tjetër, kryetari i parlamentit iranian, Mohammad-Bagher Ghalibaf, ka mohuar që negociata të tilla të kenë ndodhur, duke i cilësuar raportimet si “lajme të rreme”./K.C/dritare.net
